Presidenti i sapozgjedhur Donald Trump është takuar në Shtëpinë e Bardhë me Presidentin Joe Biden. Ata shtrënguan përzemërsisht duart përpara oxhakut të ndezur në Zyrën Ovale ku u zhvillua takimi i tyre.
“Politika është e ashpër, shpesh nuk është një botë e këndshme. Por sot është një ditë e bukur dhe unë jam mirënjohës për një tranzicion kaq të qetë", i tha Trump presidentit Biden në Zyrën Ovale, duke shtuar se "e vlerësoi shumë" ftesën e presidentit.
“Epo, zoti President i zgjedhur, ish-president, Donald. Urime", tha Biden ndërsa Trump u ul pranë tij në Zyrën Ovale.
Biden i tha "mirë se erdhët përsëri" presidentit të zgjedhur dhe të dy udhëheqësit më pas shtrënguan duart.
Presidenti Joe Biden i tha se pret një "tranzicion të qetë" në janar, duke shtuar se ai do të "sigurohet" që paraardhësi dhe pasardhësi i tij të akomodohen, ndërsa ai rimerr Shtëpinë e Bardhë në janar.
Të dy presidentët ishin të buzëqeshur dhe të relaksuar, të sjellshëm me njëri-tjetrin, një qëndrim dhe atmosferë krejtësisht e ndryshme krahasuar me debatin televiziv të qershorit, takimi i fundit i drejtpërdrejtë mes të dyve, të cilët që nga ajo kohë janë takuar vetëm në përkujtimet e 11 shtatorit.
Zonja e Parë në largim iu bashkua Presidentit Joe Biden për të përshëndetur Presidentin e sapozgjedhur Donald Trump në Shtëpinë e Bardhë. Jill Biden i dha Trumpit një letër për gruan e tij, Melania Trump, e cila zgjodhi të mos merrte pjesë në takim.
Vizita e Donald Trump në Shtëpinë e Bardhë sot - me ftesë të Presidentit Joe Biden - është një rikthim në traditën që u shmang në vitin 2020, kur Trump ishte presidenti në largim dhe Biden ishte presidenti i zgjedhur.
(A2 Televizion)
A2 CNN Livestream
MUND TE LEXONI GJITHASHTU
