Panairi i Biznesit në Mostar të Bosnje dhe Hercegovinës bëri bashkë Aleksandër Vuçiç, Milorad Dodik dhe Miroslav Lajçak. Presidenti serb takoi ndërmjetësuesin e Bashkimit Europian për dialogun Prishtinë-Beograd. Vuçiç njofton se me Lajçakun pati një bisedë të hapur dhe konkrete për ato që i konsideroi “sfida që e presin popullin serb, ngjarjet në Kosovë dhe zvogëlimin e hapësirës për zgjidhjen e çështjeve të hapura përmes dialogut konstruktiv dhe respektimit të së drejtës ndërkombëtare.”
“Si partneri ynë afatgjatë, Lajçak e di se Serbia gjithmonë dhe kudo do të luftojë për popullin, vendin dhe të vërtetën e saj. Ne nuk kemi atdhe tjetër, as nuk mund të shkojmë diku tjetër”, tha Vuçiç.
Presidenti serb pretendoi më tej se vendi i tij po bën një politike të përgjegjshme dhe serioze për ruajtjen e paqes dhe stabilitetit në rajon, por paralajmëroi se nuk do të ketë asnjë tërheqje apo kompromis për sigurinë e serbëve dhe mbrojtjen e interesave kombëtare. Si për të treguar afrimitetin e tij me Lajçakun, Vuçiç tentoi dhe të bënte disa shaka, duke marrë shkas edhe nga raportimet se nuk do të jetë më në rolin e ndërmjetësuesit të BE-së për dialogun Prishtinë-Beograd. Presidenti serb “kritikoi” organizatorët duke thënë se nuk kanë ditur ta prezantonin Lajçakun.
“Ata e dinë se diçka është nga Europa, tani çfarë është, as ai vetë nuk e di, por nuk ka rëndësi. Dhe e vure re Miroslav, për ty duartrokitëm vetëm dhjetë vetë, por kur dola unë kishte shumë më shumë. Duhet të Punoni më shumë për imazhin dhe reputacionin e Europës”, theksoi presidenti serb.
Gjatë qëndrimit në Bosnje, Vuçiç ka folur me Dodikun lidhur me rezolutën për gjenocidin në Srebrenicë që pritet të miratohet në Asamblenë e Përgjithshme të Kombeve të Bashkuara. Presidenti serb pretendoi se vendi i tij ka vërtetuar para Gjykatës Ndërkombëtare të Drejtësisë se nuk është përgjegjës. Kurse Dodiku i sanksionuar, tentoi të minimizonte gjenocidin në Srebrenicë, duke pretenduar se janë vrarë më shumë serbë në Sarajevë dhe se po tentohet të krijohet një mit me Srebrenicën. (A2 Televizion)
A2 CNN Livestream
MUND TE LEXONI GJITHASHTU
