Rusia nuk ndal bombardimet në Ukrainë, ndërsa luftohet ashpër në çdo front. Kievi njofton se vetëm në 24 orët e fundit ka thyer më shumë se 50 sulme të forcave pushtuese në drejtim të rajoneve lindore.
Por ka pasur edhe nga ato raketa që nuk i ka ndalur dot, të cilat sollën një rezultat të trishtë. Të paktën 5 civilë janë vrarë në orët e fundit në lindje të Ukrainës. Rusia ka kryer sulme edhe në Zaporizhzhia, duke vrarë një vajzë të vogël 12 vjeçare dhe babanë e saj.
Prokuroria e përgjithshme e Ukrainës ka njoftuar se që prej fillimit të luftës, janë vrarë 468 fëmijë dhe plagosur thuajse 1 mijë të tjerë. Pjesa më e madhe e minorenëve të prekur nga lufta, raportohen në Donjeck.
Sakaq, 31 fëmijë janë ribashkuar me familjet e tyre në Ukrainë, pas një operacioni të gjatë për kthimin e tyre nga Rusia dhe Krimea. Kievi vlerëson se 19500 fëmijë janë rrëmbyer nga forcat pushtuese që nga nisja e luftës, në ato që i konsideron deportime të paligjshme.
Megjithatë, Moska i ka mohuar gjithmonë këto akuza. Duke qëndruar tek Rusia, “skifteri” i Putinit kërcënon se Ukraina do të zhduket nga faqja e dheut, pasi askush nuk ka nevojë për të.
“Ai shtet është një keqkuptim që doli nga shpërbërja e Bashkimit Sovjetik”, tha Dmitry Medvedev, ish president dhe aktualisht zëvendëskryetar i këshilli të sigurisë të Rusisë.
“Ne aktualisht kemi nevojë për një Rusi të madhe”, përfundoi zyrtari, ndër miqtë më të mirë të presidentit Vladimir Putin. (A2 Televizion)
A2 CNN Livestream
MUND TE LEXONI GJITHASHTU
