Pas Vlorës, flamuri i Pavarësisë ngrihet edhe në Tiranë. Veliaj: Shqipëria, në ditët e saj më të mira!

Është ngritur edhe në Tiranë flamuri i Pavarësisë, në përkujtim të 112 vjetorit të pavarësisë së Shqipërisë nga pushtuesit osman.

Në ceremoninë e ngritjes së flamurit në Sheshin Skënderbej, ishte i pranishëm edhe kryebashkiaku Erion Veliaj, shkruan A2 CNN.

Po ashtu, qindra qytetarë kanë dalë në shesh me flamuj kuqezi, për të festuar nën ritmin e këngëve popullore shqiptare Ditën e Pavarësisë.

Veliaj tha gjatë fjalës së tij se sot Shqipëria është në ditët e saj më të mira, me shpresën se do të bëhet anëtare e BE-së.

“Sot jemi në ditët tona më të mira. Shqipëria është një vend që do të jetë ndoshta anëtari i ardhshëm i BE-së. Kosova është e pavarur. Tirana para 2 vitesh ishte kryeqyteti Europian e Rinisë, një vit më parë ishte kryeqyteti europian i Sportit. Gëzuar ditën e Flamurit, të rrojë Shqipëria e shqiptarët kudo që janë”, tha Veliaj.

Më herët flamuri u ngrit edhe në Vlorë, ku morën pjesë krerët më të lartë të shtetit, përfshi edhe kryeministrin e Kosovës, Albin Kurtin.

Më pas në Vlorë shkuan edhe përfaqësues të opozitës, të cilët uruan shqiptarët nga qyteti bregdetar për Ditën e Pavarësisë.

Kujtojmë se 112 vite më parë, plaku i mençur, Ismail Qemali, sëbashku me patriotë të tjerë shqiptarë, ngritën flamurin e Pavarësisë në Vlorë, duke e shpallur Shqipërinë të lirë.

  (A2 Televizion)