Zjarret në vend, Ministria e Mbrojtjes: 4 vatra aktive, 126 forca në terren dhe dy helikopterë

Nga 6 vatra zjarri të regjistruara në vendin tonë, 4 prej tyre vijojnë të jenë aktive dhe dy janë në monitorim. Në një përditësim të fundit Ministria e Mbrojtjes njofton se në terren janë angazhuar 126 forca operacionale vendore, ndërsa Forcat e Armatosura mbështesin operacionet me 90 efektivë dhe 2 helikopterë.

Vatrat aktive janë në Dajt dhe Priskë të Tiranës, Lufaj të Mirditës dhe Tërbun të Pukës. Në asnjë prej zonave nuk raportohet rrezik për banesat.

Në Gurë-Lurë zjarri është shuar dhe zona po monitorohet, ndërsa në Qafë Helmes vatra është izoluar dhe vijojnë ndërhyrjet e forcave lokale.

Ministria e Mbrojtjes - përditësim mbi situatën e zjarreve

(19 Gusht 2026 - ora 14:00)

Ministria e Mbrojtjes informon se deri në orën 14:00, në territorin e vendit janë regjistruar 6 vatra zjarri, nga të cilat 4 mbeten aktive dhe 2 janë nën monitorim.

Në terren janë angazhuar 126 forca operacionale vendore, ndërsa Forcat e Armatosura mbështesin operacionet me 90 efektivë dhe 2 helikopterë të Forcës Ajrore.

Vatrat aktive kryesore janë:

* Dajt, Tiranë – vijon operacioni me 50 efektivë të FA, 15 forca të MZSH dhe 5 forca të AZM. Nuk ka rrezik për zonat e banuara.

* Priskë, Tiranë – forcat e MZSH vijojnë punën pas riaktivizimit të vatrës; nuk ka rrezik për banesat.

* Lufaj, Mirditë – vatra mbetet aktive me intensitet të ulët; në terren janë 8 forca të Shërbimit Pyjor dhe 4 zjarrfikës me 1 automjet zjarrfikës. Nuk ka rrezik për zonat e banuara.

* Tërbun, Pukë – operacioni vijon me forcat në terren për hapjen e korridoreve ndarëse, pas përfundimit të ndërhyrjes nga ajri. Situata konfirmohet nën kontroll dhe nuk ka rrezik për zonat e banuara.

Situata paraqitet në përmirësim edhe në Gurë-Lurë, ku zjarri është shuar dhe zona mbahet në monitorim, ndërsa në Qafë Helmes vatra është izoluar dhe vijojnë operacionet me forcat lokale.

Strukturat e Mbrojtjes Civile vijojnë angazhimin dhe monitorimin në terren, me situatën përgjithësisht të stabilizuar dhe pa rrezik të raportuar për zonat e banuara. (A2 Televizion)