Cilët janë faktorët që kanë rënduar skemën e pensioneve?

Kryeministri Rama ka njoftuar sot reformimin e skemës së pensioneve, në përpjekje për të rritur pensionet, “teksa kolapsi i vitit 2014”, siç ai e konsideroi në fjalën e tij, tashmë ka kaluar. Por cilët janë faktorët që kanë rënduar skemën dhe që u pranuan publikisht edhe nga qeveria?

Niveli i lartë i emigrimit; niveli i lartë i informalitetit dhe mosdeklarimi i pagave janë tre arsyet kryesore pse skema është sot në deficit. 

Një situatë e tillë ka bërë që të mblidhen më pak të ardhura në buxhet, të cilat të ishin në dispozicion të skemës për të rritur pensionet.

Shqipëria mbledh të ardhura nga 27.2% e Produktit të Brendshëm Bruto, duke lënë pas vetëm Kosovën. Teksa vendet e tjera mbledhin të ardhura shumë më shumë. 

Sot pensionistët shqiptarë janë më të varfrit e rajonit.

Një pensionist në qytet merr sot rreth 18.600 lekë në muaj ose 620 lekë në ditë. Ndërkohë që pensioni në fshat është shumë më i ulët dhe vlerësohet në 10.888 lekë në muaj ose rreth 363 lekë në ditë. (A2 Televizion)