Shqipërinë e vizituan mbi 6.3 milionë të huaj deri në muajin e shkuar. Të dhënat nga Instituti i Statistikave tregojnë se në krahasim me janar-korrikun e një vitit më parë, shifrat e turistëve janë zgjeruar me mbi gati 1.2 milionë apo 23.2 për qind.
“Nuk besoj te këto shifra përndryshe nuk do të kishim këtë situatë”, thotë për A2 CNN Rrahman Kasa, kreu i Unionit Turistik Shqiptar.
Pas muajve të tërë me rritje dyshifrore, turizmi në muajin korrik u rrit me vetëm 2.7 për qind duke dhënë shenja të qarta ngadalësimi dhe duke konfirmuar situatën që turoperatorët dhe strukturat akomoduese raportonin në pjesën e parë të këtij muaji.
“Një tjetër element është turisti kosovar që mungon këtë vit si pasojë e liberalzimit të vizave, por edhe ofertave më të mira nga vendet e tjera”, thotë Kasa.
Ndërkohë, deri në korrik nga vendi rezulton të kenë dalë gati 4.4 milionë shqiptarë, pjesa më e madhe e të cilëve më shumë se sa një herë. Në krahasim me janar-korrikun e një viti më parë, numri i shqiptarëve që kanë dalë nga ajri, toka apo deti është rritur me gati 617 mijë apo 16.4 për qind.
“Po shkojnë në Turqi, në Sicili. Kjo pasi tashmë ka dy avionë në javë. Veriu i Greqisë, Halkidiki është gjithashtu shumë e preferuar”, thotë Kasa.
Të dhënat nga INSTAT tregojnë se pjesa më e madhe e atyre që vizituan Shqipërinë deri në korrik, mbi 65 e totalit ishin nga shtet europiane. Pjesa tjetër rezultojnë nga Shtetet e Bashkuara të Amerikës, Azia Lindoree Paqësori e Afrika.
(A2 Televizion)
A2 CNN Livestream
MUND TE LEXONI GJITHASHTU
