Gjykata e Lartë vendosi të mos lirojë nga masa e sekuestros pasuritë e Jamarbër Malltezit dhe Argita Berishës, përkatësisht dhëndrit dhe vajzës së ish-kryeministrit, Sali Berisha. 25 pasuri të tyre, të tundshme e të patundshme, janë ngrirë nga Gjykatat e Posaçme me kërkesë të SPAK, për llogari të hetimit të privatizimit të ish-kompleksit sportive “Partizani”, dosje në të cilën Malltezi është i dyshuar për akuzën e “korrupsionit” dhe “pastrimit të parave”.
Në Gjykatën e Lartë bashkëshortët Malltezi kundërshtuan vendimin e 24 nëntorit të vitit të kaluar të Apelit të Posaçme, që bllokoi pasuritë e tyre, si të pa justifikuara në burime të ligjshme. Një Kolegj Penal i përbërë nga gjyqtarët Ilir Panda, Sokol Binaj e Sandër Simoni vendosi të mos pranojë rekursin e bërë prej tyre, duke e lënë kështu në fuqi masën e sekuestros.
Pasuritë e “ngrira” të bashkëshortëve Malltezi janë një vilë në Gjirin e Lalëzit, disa apartamente, troje, 6 llogari bankare, por edhe përqindjet takuese të tij në disa shoqëri tregtare. Bllokimi i tyre u bë më 20 tetor të vitit të kaluar, pasi emri i Jamarbër Malltezit u regjistrua si person nën hetim në çështjen “Partizani”.
Për këtë hetim penal Malltezi fillimisht u arrestua dhe u la në “arrest në burg”, ndërsa më 21 nëntor masa ndaj tij u zbut në “arrest në shtëpi”. Sipas SPAK,Malltezi ka përfituar 5.4 milionë euro përmes përdorimit të funksionit publik të vjehrrit të tij kryeministër. (A2 Televizion)
A2 CNN Livestream
MUND TE LEXONI GJITHASHTU
