Kryeministri Edi Rama zhvilloi sot një takim me komunitetin e biznesit, ku në qendër të diskutimit ishte nisma e “paqes fiskale”, tashmë e miratuar si ligj dhe që pritet të nisë zbatimin nga janari i vitit të ardhshëm. Rama theksoi se kjo nismë synon të krijojë një urë të re besimi mes sipërmarrjes dhe administratës tatimore, pa cenuar integritetin ligjor.
“Paqja fiskale është një zotim i yni i fushatës elektorale dhe sot është ligj. Duke filluar nga janari i vitit të ardhshëm, do ta zbatojmë atë si një instrument për të ndërtuar një marrëdhënie të re besimi mes shtetit dhe biznesit”, u shpreh kryeministri, përcjell A2 CNN. Ai sqaroi se për çdo rregullim të pasqyrave fiskale të viteve të shkuara, fitimi do të tatohet vetëm 5%, një normë shumë më e ulët se tatimi i zakonshëm mbi fitimin.
Sipas Ramës, kjo masë ndihmon formalizimin dhe u jep mundësi sipërmarrjeve të korrigjojnë gabimet e së shkuarës pa barrë të rëndë financiare. “Për çdo pasqyrë të korrigjuar, fitimi tatohet vetëm 5%. Kjo rrit formalizimin dhe nuk cenon integritetin ligjor të gjithë ndërveprimit”, tha ai. Kryeministri shtoi se paralelisht do të ketë lehtësi edhe për gjobat, nga fshirja e plotë deri te pagesa me këste, në varësi të vjetërsisë.
Gjatë takimit, Rama debatoi edhe me përfaqësuesit e sektorit të ndërtimit. “Ju jeni sektori me fitimin më të lartë në Shqipëri dhe akoma deklaroni punonjës me paga minimale. Çfarë mbështetje kërkoni?”, deklaroi ai. (A2 Televizion)
A2 CNN Livestream
MUND TE LEXONI GJITHASHTU
