Sulmet në Siri, qindra familjarë të militantëve të ISIS largohen nga kampi

Qindra shtetas të huaj, që kanë lidhje me ISIS, kanë ikur nga një kamp në veri të Sirisë, teksa ofensiva ushtarake e Turqisë në këtë shtet po vazhdon.

Lajmi raportohet nga zyrtarët kurdë, të cilët thanë se të ndaluarit sulmuan portat e kampit Ain Issa, teksa luftimet po vazhdojnë në afërsi të kampit.

Turqia nisi ofensivën në veri të Sirisë, vetëm pak ditë pasi presidenti i Shteteve të Bashkuara, Donald Trump mori vendim që të tërheqë trupat amerikane nga kjo zonë.

Ankaraja i konsideron luftëtarët kurdë në Siri si terroristë dhe thotë se kanë lidhje me Partinë e Punëtorëve të Kurdistanit, grup ky që për vite të tëra zhvillon kryengritje brenda Turqisë. Vendimi për nisjen e ofensivës turke është kritikuar nga shumë vende perëndimore dhe SHBA-ja, po ashtu edhe Bashkimi Europian, e kanë kërcënuar Ankaranë me vendosje të sanksioneve.

Organizata e Kombeve të Bashkuara vlerëson se 130 mijë persona janë zhvendosur nga Siria, që nga përshkallëzimi i dhunës. Ndërkohë, kancelarja gjermane, Angela Merkel përmes një bisede telefonike i ka kërkuar Erdogan-it “ndërprerjen e menjëhershme të operacionit ushtarak” të Turqisë në Siri. (A2 Televizion)