Ujdia mes Shteteve të Bashkuara dhe talebanëve e sigluar nën udhëheqjen e Donald Trump, shpejtoi përmbysjen e qeverisë afgane sipas zyrtarëve amerikanë të mbrojtjes.
E ashtuquajtura marrëveshja e Dohas, u firmosur në shkurt të 2020-tës, vendosi një datë për largimin e trupave amerikane. por sipas gjeneralit Frank McKenzie, i cili mbikëqyri tërheqjen, ujdia pati një ndikim fatal tek qeveria dhe ushtria afgane.
“Marrëveshja e Dohas pati një efekt të fortë psikologjik tek qeveria afgane, pasi vendosi një datë për fundin e mbështetjes”, u shpreh McKenzie.
Ai tha se e kishte menduar prej kohësh, se nëse Shtetet e Bashkuara do të reduktonin numrin e këshilltarëve ushtarakë nën 2500, dështimi i qeverisë dhe ushtrisë afgane do të ishte i pashmangshëm.
Edhe sekretari i Mbrojtjes Lloyd Austin është në një mendje dhe thotë se ujdia kishte ndihmuar talebanët të fuqizoheshin.
“Talebanët u fuqizuan, intensifikuan ofensivën kundër forcave afgane dhe afganët nisën të humbisnin një sërë njerëzish, çdo javë”, deklaroi Lloyd Austin.
Zyrtarët e lartë të mbrojtjes i bënë komentet gjatë dëshmisë ditën e mërkurë për komisionin e forcave të armatosura në Dhomën e Përfaqësuesve. Seanca po zhvillohet disa javë pas tërheqjes kaotike nga aeroporti i Kabulit, dhe vrasjes së 182 personave gjatë operacionit.
Më herët, në deklaratat para komisionit, gjenerali Austin Miller dhe McKenzie, thanë se kishin rekomanduar qëndrimin e një force prej 2500 trupash në Afganistan, para tërheqjes së plotë në gusht. Sipas zyrtarëve të mbrojtjes talebanët do të bënin më të vështirë mbrojtjen e amerikanëve nga sulmet terroriste , ndërsa paralajmëruan se grupi ka ende lidhje me Al Kaedën. (A2 Televizion)
A2 CNN Livestream
MUND TE LEXONI GJITHASHTU
