Ish-ambasadori i Shqipërisë në Mbretërinë e Bashkuar dhe anëtari i Këshillit të ambasadorëve shqiptarë, Mal Berisha, ishte i ftuar në Ditarin e A2 ku bëri një përmbledhje të procesit zgjedhor që u zhvillua në Shtetet e Bashkuara të Amerikës.
Ambasadori Berisha bëri dhe një koment në lidhje se cili prej kandidatëve do të ishte më i mirë për interesat e shqiptarëve dhe rajonin e Ballkanit Perëndimor.
Sipas Berishës, senatori dhe ish-zv/.presidenti, Joe Biden, ka një lidhje më të ngushtë me Kosovën kjo edhe për një çështje shpirtërore dhe familjare të tij.
“Raportet e senatorit Biden në lidhje me shqiptarët janë pozitive. Besoj se shumë shqiptarë e kanë parë deklaratën që ka dhënë në ligën shqiptaro-amerikane para shumë vitesh ku ka shprehur dashurinë dhe respektin e tij për popullin shqiptar, sidomos në Kosovë dhe angazhimin e tij për ta ndihmuar atë. Është një person që ka kaluar një jetë me një karrierë të jashtëzakonshme politike që nga 1972.
Para disa vjetësh ai ka humbur djalin e tij 42-vjeçar, i cili ishte prokuror i përgjithshëm i shtetit të Delaware dhe autoritetet e Kosovës i kanë vënë emrin e djalit emrit të një rrugë në qendrën më të madhe ushtarake amerikane. Biden ka sjellë të gjithë familjen e tij kur ajo rrugë është inauguruar dhe ka lënë një amanet nipërve dhe mbesave për të vizituar këtë popull që ka përkujtuar djalin e ndjerë.
SHBA në fakt është ajo që e nxori Kosovën nga tmerri i zgjedhës serbe, e që ndërhyri duke drejtuar forcat e NATO. Kosovën e lirë që shohim është falë kësaj ndërhyrjeje. Joe Biden ka qenë një ndër vendimmarrësit bashkë me Gillman, Hyde, Libermman, McCain. Kështu që ai ka një njohje dhe lidhje të shkëlqyer me Kosovën. Gjithashtu, edhe për Shqipërinë ai ka njohje të plota pasi ka pasur takime me liderët shqiptarë sidomos në takimet e NATO”, u shpreh Mal Berisha.
Për Berishën, shqiptarët në Ballkan duhet të plotësojnë standardet e kërkuara “Çështja nuk është Biden apo Trump, por Amerika me ne dhe ne me Amerikën. Që kjo të ndodhë duhet që shqiptarët në 3 shtetet e Ballkanit, të punojnë fortë që standardet që kërkon ai shtet mik i madh, t’i plotësojmë. Presidenti Bush, pak para se të humbte mandatin e dytë deklaroi se ka një vijë të kuqe që nuk mund ta kalonte Slobodan Milošević”, u shpreh Berisha. (A2 Televizion)
A2 CNN Livestream
MUND TE LEXONI GJITHASHTU
