3 muaj i vetëm në det të hapur për shkak të koronavirusit

Ndërsa pjesa më e madhe e botës qëndron e mbyllur në shtëpi prej muajsh, krejt e kundërta ka ndodhur me Wong Tetchoong nga Singapori, i cili ka kaluar rreth 3 muaj i vetëm në det të hapur për shkak të... koronavirusit.

Një histori e denjë për film, të cilën 59-vjeçari e jetoi dhe për fatin e tij të mirë fundi ishte i lumtur, edhe pse mes vuajtjesh.

Ai u nis në lundrim me jahtin e tij modest më 2 shkurt, në ditët e para të shpërthimit të koronavirusit, kur shumica e rasteve ishin ende të kufizuara në Kinë, nga ku shpërtheu edhe pandemia. Lundrimi i Wong nisi së bashku me dy miqtë e tij nga Indonezia, por më 28 shkurt aventura e tij mori një tjetër rrjedhë, kur mbeti i vetëm, pasi dy miqtë e tij u larguan në vendin e tyre, teksa po mbylleshin kufijtë për shkak të frikës nga Covid-19.

Wong kishte tentuar të ankoronte në Indonezi, por nuk arriti pasi rrymat detare ishin shumë të forta. Kështu, ai vendosi të lundronte drejt Papua Guineas së Re.

“Nga Indonezia lundrova për në Papua, por kur arrita atje, ata i mbyllën kufijtë dhe nuk më lejuan dhe vendosa të shkoj në ishujt Solomon”, është shprehur ai për “Fiji Sun”. “Edhe këtu nuk u lejova dhe vazhdova lundrimin drejt Tuvalu. Sërish e njëjta histori, por të paktën vendasit më siguruan ushqim të bollshëm”.

Pasi u refuzua nga 3 shtete për shkak të mbylljes së porteve, Wong nuk kishte zgjidhje tjetër veçse të kthente “velat” e tij për në drejtim të ishujve Fixhi, një lundrim që i mori atij plot 6 ditë dhe 6 net në det të hapur.

Ai arriti në Fixhi më 28 prill dhe zbuloi se edhe aty siguria ishte rritur ndjeshëm. Megjithatë, 59-vjeçari nuk mund të largohej sërish pasi autopiloti i jahtit të tij ishte dëmtuar.

Dy net të tjera, ai qëndroi pranë portit, ku jahti i tij pësoi dëmtime të tjera nga era e forta dhe Marina e Fixhit e ndihmoi më në fund atë, ndërsa jahtin e ankoroi në port më 30 prill. “The Guardian” shkruan se Wong u lejua në Fixhi pas bisedimeve të qeverisë vendase dhe asaj të Singaporit.

Për “Fiji Sun”, Wong Tetchoong është shprehur se ai do të rikthehet menjëherë te gruaja dhe dy vajzat e tij në Singapor sapo kufijtë të hapen. “Është hera e parë që vij në Fixhi. Vendi këtu më pëlqen, por dua ta pranoj se nuk ishte një destinacion i planifikuar në këtë lundrim. Një falënderim i madh për Marinën vendase dhe qeverinë që erdhën dhe më shpëtuan”, ka thënë 59-vjeçari, i cili i shpëtoi dallgëve, por tashmë duhet të bëjë kujdes nga koronavirusi. (A2 Televizion)