Aktorja e njohur Michelle Trachtenberg është ndarë nga jeta në moshën 39-vjeçare. Sipas policisë së Nju-Jorkut, ajo u gjet pa ndjenja në apartamentin e saj në Manhattan të mërkurën në mëngjes dhe u shpall e vdekur në vend, shkruan A2 CNN. Autoritetet konfirmuan se nuk dyshohet për ndonjë akt kriminal, ndërsa shkaku zyrtar i vdekjes do të përcaktohet nga Mjekësia Ligjore.
Trachtenberg u bë e njohur si fëmijë me rolin kryesor në filmin e Nickelodeon “Harriet the Spy” (1996) dhe më pas me personazhin e Dawn Summers në serialin “Buffy the Vampire Slayer”. Ajo fitoi famë edhe me interpretimin e saj si Georgina Sparks në “Gossip Girl”.
Lajmi për ndarjen e saj nga jeta ka tronditur komunitetin e aktorëve dhe fansat e saj. Kolegia e saj nga filmi “Ice Princess”, Kim Cattrall, publikoi një foto të tyre së bashku, duke shkruar: “Prehu në paqe, e ëmbla Michelle”. Ndërkohë, aktori James Marsters nga “Buffy the Vampire Slayer” u shpreh se “zemra e tij është e rënduar” pas këtij lajmi.
Në postimet e saj të fundit në rrjetet sociale, Trachtenberg kishte ndarë kujtime nga tapeti i kuq dhe kishte reflektuar mbi karrierën e saj.
E njohur për humorin e saj të zgjuar dhe aftësinë për të portretizuar personazhe të ndërlikuara, Michelle Trachtenberg la pas një trashëgimi të pasur në televizion dhe film. (A2 Televizion)
