Hapet rruga që të çon “drejt reve”, shkallët lëvizëse më të gjata në botë

Kina ka inauguruar një nga projektet më mbresëlënëse të turizmit modern, “Shkallët drejt reve”, një sistem i lidhur shkallësh lëvizëse që ngjiten deri në majën e malit Lingshan, në provincën Jiangxi. Ky mal, me një lartësi prej gati 1.500 metrash, ishte më parë i arritshëm vetëm për alpinistë me përgatitje të mirë fizike, por tani çdo vizitor mund të shijojë pamjet spektakolare pa mundim, shkruan A2 CNN.

Infrastruktura përbëhet nga shkallë lëvizëse me një gjatësi totale prej 1.236 metrash, që ngjiten më shumë se 88 kate nga baza e malit deri në majë. Projekti synon të lehtësojë qasjen për të moshuarit dhe personat me lëvizshmëri të kufizuar, duke i bërë majat e Lingshanit të arritshme për të gjithë.

Shembulli i parë i këtij “revolucioni vertikal” në turizëm u pa në malin Tianyu, ku sistemi i ngjashëm i shkallëve lëvizëse u bë viral në vitin 2023, duke tërhequr mijëra vizitorë. (A2 Televizion)