Biokarburantet në transport: Pas 4 vitesh në sirtarët e “Kuvendit”, ligji i ri për konsultim publik

Çdo ditë, më shumë se 740 mijë automjete lëvizin në rrugët e Shqipërisë, të shtrira në rreth 18 mijë kilometra.

Pjesa më e madhe e tyre djegin naftë, rreth 17 për qind benzinë dhe pjesa tjetër punojnë me gaz apo energji elektrike.

Transporti publik zë një pjesë të konsiderueshme në djegien e karburanteve, duke u vlerësuar si kontribuuesi më i madh i CO2 në vend.

“Transporti është përgjegjës për shkarkimin e 3.3 milionë ndotje në ajër çdo vit. Ky është problemi më i madh i ndotjes në vend,” shprehet eksperti për mjedisin, Rodion Gjoka.

Një draft-ligj i hartuar nga Ministria e Infrastrukturës dhe Energjisë, hedhur për konsultim publik synon të nxisë përdorimin e biokarburanteve në vend, veçanërisht në transportin publik.

Sipas draftit sasia minimale vjetore në treg e biokarburanteve dhe e lëndëve të tjera djegëse, të rinovueshme, për transport, duhet të jetë jo më pak se 5 për qind të sasisë të konsumuar në sektorin e transportit në vitin 2024.

Nga viti 2025 e në vazhdim, kjo sasi do të jetë jo më pak se 10 për qind.

Projektligji për “Biokarburantet” në fakt është depozituar në Kuvend që para 4 vitesh, por pa marrë votat e nevojshme për miratim. (A2 Televizion)