Ditën punonin në bankë, natën adhuronin Hitlerin dhe përgatisnin një atentat ndaj xhamisë

Punonin kryesisht në bankë, ose si shoferë autobusi. Persona që banorët e Sienës në Itali takonin shpesh, në përditshmërinë e tyre.  

Por pas 8-orarshit zyrtar, ata mblidheshin në një apartament që kishin shndërruar në një tempull të urrejtjes dhe të doktrinës naziste.

Edhe forcat e policisë italiane u habitën pas përgjimeve që çuan në arrestimin e 10 personave, me akuzat e mbajtjes ilegale të armëve luftarake, si dhe të krijimit të organizatës me qëllime ekstremiste.

Pikërisht një arkëtar në bankë, 60-vjeçari Andrea Chesi dhe djali i tij 22-vjeçar ishin organizatorët e grupit, që kishin grumbulluar një sasi të frikshme armësh, disa historike të luftës së dytë botërore, por edhe armë moderne dhe gati për t’ u përdorur. Ekstremistët kishin mbledhur edhe sasi lënde shpërthyese, me të cilin sipas përgjimeve mendonin të organizonin një atentat ndaj një xhamie të zonës, në Colle Val d´Elsa.  

Përtej armëve, apartamenti ishte shndërruar në një muze me objekte të ndryshme të nazizmit, si dhe dokumente që parashikonin plane veprimi kundër “sundimit islamik” në Europë. (A2 Televizion)