Durrësi ka qenë një nga qytetet më të goditura shqiptare në vitin që po mbaron. I prekur drejtpërdrejt nga tërmeti i 26 Nëntorit dhe më pas nga masat parandaluese ndaj COVID-19, qyteti turistik po përjeton një krizë pasojat e së cilës ende nuk janë shfaqur plotësisht. Profesor Selami Xhepa komentoi në A2 rezultatet e një studimi të Fondacionit për Shoqërinë e Hapur, ku ai është përfshirë, që analizon efektet reale ekonomike të qindra bizneseve, kryesisht ato të voglat dhe të bazuar në shërbim edhe turizëm. “Janë intervistuar rreth 500 kompani të tilla, por janë zhvilluar fokus grupe edhe me kompani më të mëdha. Shkalla dhe intensiteti i kësaj goditje ka qenë shumë i fortë. Gati një e treta e këtyre bizneseve janë në prag të falimentimit”, thotë profesori. Gjatë viteve të fundit, sektori i turizmit ishte një lokomotivë rritje, ku deri 3 muaj para tërmetit, sipas studimit, “42% të aktiviteteve kishin rritje deri në 10%, ndërkohë që tani rezulton se gati 2/3 e aktiviteteve ka patur një përgjysmim të ardhurash, që e bën shumë të vështirë mbijetesën”. Kompanitë e targetuara nga studimi janë përpjekur të mbajnë të punësuarit, kryesisht duke shfrytëzuar burimet personale, ndërkohë që ka qenë i kufizuar shfrytëzimi i institucioneve bankare. Kjo ndodh, sipas Xhepës, “sepse në këtë fushë biznesi, në qoftë se prishet zinxhiri, është e vështirë të rikthehet në gjendjen fillestare. Plus që fondet e likuiditetit të vëna në dispozicion nga qeveria janë shfrytëzuar më shumë nga bizneset e mëdha”. Studimi tregon edhe se një pjesë e madhe e bizneseve të goditura në Durrës mendon se do të duhen të paktën 2 vite për të rikuperuar gjendjen e mëparshme. (A2 Televizion)
Durrësi i goditur nga tërmeti dhe pandemia, Xhepa: Një e treta e bizneseve në prag të falimentimit
