Komisioni Hetimor për inceneratorët vijon sot në ditën e 4-t seancën e marrjes në pyetje të dëshmitarëve. Dëshmitarja e parë është sekretarja e Përgjithshme e Ministrisë së Financave, Viola Haxhiademi, e cila po jep llogari para anëtarëve, mbi lëvrimin e parave nga institucioni që ajo përfaqëson për kompanitë e inceneratorëve.
Pjesë nga marrja e dëshmisë së Viola Haxhiademit
Jorida Tabaku: “Në rastin e Fierit, është dhënë pagesa për punime të pakryera, e thotë vetë buxheti. Për tri vite nuk është ndërtuar në Fier, e kanë deklaruar vetë, 20 milionë euro punime të pakryera. Është shkruar në bilancin zyrtar, dorëzuar në QKB”.
Viola Haxhiademi: “Mos keqinterpretoni, situacione ka, janë të certifikuara dhe të firmosura nga personat përgjegjës”.
Tabaku: “Në momentin që po hetohet për inceneratorin e Fierit a nuk është vepër penale të vazhdoni me pagesat?”
Haxhiademi: “Nuk jam në dijeni të këtyre detajeve. Nuk mund të bëj komente për këtë çështje”.
Haxhiademi tha se vlera e paguar nga buxheti i shtetit për Impiantin e Elbasanit ishte reth 21,6 milionë euro pa TVSH, për atë të Fierit rreth 27,5 milionë euro, ndërsa për impiantin e Tiranës nuk paguhen para nga buxheti i shtetit për ndërtimin.
Debatet që shoqëruan dëshminë e Haxhiademit, sollën reagimin e socialistëve në komision. Deputeti Eduard Shalsi kërkoi pezullimin e seancës së marrjes në pyetje, për shkak të shkeljeve nga ana e demokratëve të cilët, sipas Shalsit, bëjnë interpretime dhe komente të përgjigjeve të dëshmitarëve. “Fjalën tymnajë sot e hodhi për herë të parë Edi Rama dhe në komision të gjithë në unison”, iu përgjigj Tabaku, duke refuzuar kërkesën për pezullimin e punimeve. (A2 Televizion)
A2 CNN Livestream
MUND TE LEXONI GJITHASHTU
