Me miratimin në Kuvend të ngritjes së komisionit për reformën zgjedhore pritet t’i hapët rrugë një tjetër diskutimi politik. Në një intervistë për A2 CNN, analisti Afrim Krasniqi thekson se pjesë e diskutimeve duhet të bëhen edhe propozimet që vijnë nga aktorë të tjerë të shoqërisë.
“Nuk duhet një marrëveshje si ajo e vitit 2020 ku dolën me marrëveshje ku vetë ato e shkelën, por duhet një draft që konsultohet dhe reflekton opinionin e Venecias dhe vendimet e Gjykatës kushtetuese”, u shpreh Krasniqi.
Për ish-kryetaren e KQZ-së Lefterie Luzi pengesë për një proces të hapur dhe gjithëpërfshirës përbën koha e shkurtër që i lihet komisioneve.
“Komisionet zgjedhore pranë parlamentit ngrihen në periudha kohe shumë të shkurtra që i referohet zgjedhjeve të ardhshme. Duhet të ishte krijuar më herët”, thotë Luzi.
Në këndvështrimin e saj, diskutimet për reformën zgjedhore duhet të qëndrojnë larg interesave elektorale afatshkurtra.
“Nuk do ta lidhja komisionin e reformës zgjedhore me zgjedhjet. Do të doja që një herë e mirë të merrte kohën e vet dhe te zgjidhte të gjitha problematikat pa u penguar nga elementi kohë, që po me vijnë zgjedhjet dhe duhet ta mbyllim sa më shpejt”, shton ajo.
Vullnëti politik sipas Krasniqit është çelësi për realizmin e një reforme të thellë.
“Shqiptarët duan të dinë, a do vazhdojnë prapë me administrim partiak, a do të vazhdojmë të jemi i vetmi vend ku komisionerët militantë vendosin për votën a do vazhdojmë prapë me një sistem me dy parti që pamundëson konkurrentët e tretë”, thekson Krasniqi.
Komisioni për reformën zgjedhore me gjasë do të shtyhen për sesionin tjetër parlamentar pasi aktualisht ai ka afat deri më 10 gusht. (A2 Televizion)
A2 CNN Livestream
MUND TE LEXONI GJITHASHTU
