Kosova hedh një hap të rëndësishëm drejt rikthimit në normalitet, duke hapur çerdhet, qendrat tregtare, kafenetë, restorantet dhe kufijtë tokësorë. Ministri në detyrë i Shëndetësisë tha se nga një qershori nis faza e tretë e lehtësimit të masave të marra për frenimin e pandemisë së Covid-19.
“Do të hapen kufijtë kryesorë tokësorë të Republikës së Kosovës, ndërsa pas një jave do të bëhet vlerësimi për mundësinë e hapjes edhe të kufijve ajrorë. Do të hapet i gjithë sektori i gastronomisë dhe shërbimeve të ngjashme, do të hapen qendrat tregtare. Do të kthehen në punë gjithë zyrtarët publikë në gjitha nivelet e institucioneve. Do të hapen të gjitha veprimtaritë e barnatoreve dhe do të fillojnë aktivitetin taksitë. Natyrisht të gjitha këto aktivitete janë të mundshme vetëm me masat mbrojtëse konform rekomandimeve të IKSHP-së dhe Ministria e Shëndetësisë”, tha Arben Vitia.
Por menjëherë më pas kanë reaguar kryetarët e komunave të Prishtinës, Obiliqit dhe Drenasit të cilët njoftuan se nuk do të hapnin çerdhet në 1 qershor, pasi nuk kanë njoftime zyrtare se si do të veprohet gjatë kësaj faze.
Vitia njoftoi gjithashtu se do të lejohej rikthimi në shkollë i nxënësve të klasave të nënta, që do t’i nënshtrohet testit në 23 qershor, ndërsa ai maturës do të mbahet në 4 korrik.
Ministri në detyrë tha se vendimet janë marrë bazuar në rekomandimet e Institutit Kombëtar të Shëndetësisë Publike, i cili ka vlerësuar se "ekziston një rrezik i reduktuar nga pandemia". Deri më tani autoritetet e Kosovës kanë raportuar 1,070 raste dhe 30 viktima nga koronavirusi. (A2 Televizion)
A2 CNN Livestream
MUND TE LEXONI GJITHASHTU
