Komisioni i Venecias i ka shqyrtuar vlefshmërinë e zgjedhjeve vendore të vitit 2019 që para dy vjetësh. Ndonëse jo në mënyrë të detajuar, ekspertët ndërkombëtarë kanë dhënë mendimin e tyre se bojkoti i zgjedhjeve nga disa subjekte politike nuk përbën shkak për t’i anuluar ato.
Opinioni që Gjykata Kushtetuese do t’i kërkojë Komisionit të Venecias mbi vlefshmërinë e zgjedhjeve vendore, është dhënë që në vitin 2019. Një nga argumentet se përse vendoret e atij viti cilësohen nga paditësit si antikushtetuese, është se ato u zhvilluan pa praninë e opozitës. Por ekspertët juristë nuk e kanë cilësuar këtë argument të mjaftueshëm për të shpallur si të pavlefshëm një proces zgjedhor.
Komisioni i Venecias: “Bojkoti i zgjedhjeve nga partitë politike, edhe në qoftë se ato përfaqësojnë një pjesë të rëndësishme të elektoratit nuk mund të pengojë zhvillimin e zgjedhjeve të rregullta. Për ndryshe, këto parti do të merrnin fuqinë për të penguar plotësisht çdo palë zgjedhje”
Arsyeja e këtij opinioni ishte iniciativa e parë e maxhorancës për të shkarkuar Ilir Metën i cili kishte firmosur dekretin që anulonte zgjedhjet vendore të 30 qershorit 2019. Pikërisht ky dekret i presidentit ishte edhe një nga argumentet pse sot kërkohet pavlefshmëria e atij procesi, por përsëri Venecia nuk e pranon veprimin e Kreut të Shtetit.
Komisioni i Venecias: “Presidenti mund të ketë tejkaluar kompetencat e tij kushtetuese duke anuluar dhe shtyrë zgjedhjet vendore pa një bazë specifike ligjore”.
Ky opinion i Venecias në vitin 2019 u kërkua nga Kuvendi, ndërsa tani është Gjykata Kushtetuese që do t’i drejtohet juristëve ndërkombëtarë. Gjasat janë që Venecia ta detajojë qëndrimin e shprehur dy vjet më parë, por janë të pakta shanset që të përmbysë një vlerësim të dhënë tashmë mbi të njëjtën çështje. (A2 Televizion)
A2 CNN Livestream
MUND TE LEXONI GJITHASHTU
