Nga tërmeti i 26 nëntorit, Ajet Meçaj humbi gruan, vajzën dhe mbesën. Në një lidhje direkte me “Ditari” në A2, ai tregon momentet e tmerrshme të asaj dite tragjike.
“Është një dhimbje që nuk përshkruhet dot. Tërmeti i orës 04:00 ka qenë shumë i fortë, ne po flinim të ndarë. Dy vajzat në dhomën e gjumit, unë në dhomën tjetër dhe gruaja në tjetër. Kishim lënë dyert hapur sepse kishte pasur edhe dy tërmete të mëparshëm. Por, ai i fundit ishte i tmerrshëm. Kam parë të thërrmohej pallati, pashë se si muret u copëtuan në grimca. Gruaja i vuri përpara dy vajzat dhe po vraponin për të dalë. Mbaj mend që mbi mua ranë inerte dhe tentoja t’i shtyja, por pa mundur dot. Më pas, u spostova dhe pashë boshllëk, pasi dhoma nuk u shemb e tëra. Pashë që dhoma jonë e gjumit ishte futur në garazhin e pallatit në krah. Kam dalë atje dhe e pashë veten në lulishte. Ktheva kokën për të parë pallatin dhe ai nuk ishte më aty”, kujton Meçaj.
“U çorientova dhe nuk po e kuptoja më se ku isha. Pashë fqinjët që kishin dalë dhe m’u kujtuan njerëzit e mi. Nisa t’i kërkoja duke u ngjitur nëpër rrënoja e duke i thërritur. M’u përgjigj vetëm mbesa, që ishte vetëm një metër larg meje, por nuk e nxirrja dot. Emergjencat erdhën me duar në xhepa, mua më ndihmuan njerëz të tjerë që gjetën krik që të ngrenë inertet”, shtoi Meçaj. (A2 Televizion)
A2 CNN Livestream
MUND TE LEXONI GJITHASHTU
