Në vendin tonë nuk kanë të ndalur prerjet e pyjeve dhe këtij fenomeni nuk i ka shpëtuar as ky pyll me gështenja në të ashtuquajtur zonë e mbrojtur, në Zërvaskë të Pogradecit, apo siç njihet ndryshe edhe si fshati Gështenjas, pikërisht për shkak të pyllit me gështenja.
Vetë banorët e fshatrave i dëmtojnë , ndërkohë që krahas masave nga administrata e zonave të mbrojtura (Adzm), ata ende nuk janë ndërgjegjësuar për t’ u kujdesur për këto pemë.
Më shumë se gjysma e kundërvajtjeve të konstatuara nga administrata e zonave të mbrojtura i përkasin pikërisht pyllit me gështenja në Zervaskë.
"Në peizazhin tokësor të Pogradecit, ka rreth 600 hektarë pyjesh me gështenjë, dhe rreth 50% të kundërvajtjeve janë pikërisht për dëmtimet ndaj pyllit te gështenjës", thotë Gani Bego, specialist i Adzm Korçë.
Edhe nga ana e administratorit të fshatit jepet një apel që banorët të mos dëmtojnë pyllin me gështenja.
“Prerja e gështenjave na sjell shumë shqetësim, i bëj thirrje bashkëfshatarëve të mos presin më pemët, por t’ i mbrojnë ato, se janë një pasuri e fshatit”, apelon për A2 kryeplaku i Zërvaskës, Seladin Çapollari.
Fenomeni i prerjes së pyjeve bëhet më shqetësues në dimër, ku pemët e prera përdoren edhe për ngrohje nga fshatarët e zonës. (A2 Televizion)
A2 CNN Livestream
MUND TE LEXONI GJITHASHTU
