Një situatë e paprecedentë ka ndodhur në Bosnje-Hercegovinë, e cila rrezikon të kthehet në një konflikt më të gjerë. Policia e Republikës Serbe të Bosnjës dëboi oficerët e policisë së shtetit nga një ndërtesë në qytetin kryesor të rajonit të Banja Lukës, një masë e cila synon zbatimin e legjislacionit separatist të miratuar nga parlamenti dhe të nënshkruar nga udhëheqësi Milorad Dodik.
Një gjykatë shtetërore javën e kaluar dënoi Dodik, presidentin e Republikës Serbe, me një vit burg dhe e ndaloi atë nga politika për gjashtë vjet. Ai e hodhi poshtë vendimin dhe të nesërmen e vendimit, parlamenti rajonal serb miratoi legjislacionin që ndalon policinë dhe gjyqësorin kombëtar nga territori i Republikës Srpska.
Dodik, një nacionalist pro-rus, nënshkroi ligjet separatiste të mërkurën në mbrëmje. Të enjten, zyra e prokurorit të shtetit tha se po hetonte atë që e përshkroi si akt kriminal të një sulmi ndaj rendit kushtetues të Bosnje dhe Hercegovinës.
Dodik u bëri thirrje të premten të gjithë serbëve që punojnë në Agjencinë Shtetërore për Informim dhe Mbrojtje (SIPA), në gjykatën dhe prokurorinë shtetërore, si dhe në Këshillin e Lartë Gjyqësor dhe Prokurorial që të largohen nga puna në mënyrë që Republika Serbe t'u sigurojë punësim në institucionet e veta.
Në një konferencë për shtyp të premten me kryeministrin në largim Millosh Vuçeviç në Banja Luka, Dodik u pyet për bastisjen e policisë së Republikës Serbe në ndërtesën e SIPA-s në qytet.
"Nëse situata është ashtu siç thoni ju, do të thotë se ligjet e miratuara nga Republika Srpska (Republika Serbe) po zbatohen", tha ai.
Dodik thotë se gjyqësori shtetëror, prokurorët dhe policia nuk janë kushtetuese sepse nuk ishin parashikuar në marrëveshjet e paqes të Dejtonit që i dhanë fund luftës së viteve 1992-95 midis serbëve të Bosnjës, kroatëve dhe myslimanëve boshnjakë, në të cilën u vranë 100,000. Policia e Republikës Serbe hyri gjithashtu në selinë e SIPA-s në qytetin e Sarajevës Lindore, njoftuan mediat lokale. Reuters nuk mundi të verifikonte në mënyrë të pavarur raportet e mediave. (A2 Televizion)
A2 CNN Livestream
MUND TE LEXONI GJITHASHTU
