Zjarret po përhapen në Ballkan, ndërsa temperaturat vazhdojnë të rriten, teksa pjesa juglindore e Evropës përjeton një nga valët më të fuqishme të të nxehtit të vitit.
Kryeministri i Bullgarisë Dimitar Glavçev u bëri thirrje qytetarëve të jenë "shumë të kujdesshëm" dhe shteti shpalli kodin e kuq për valët e të nxehtit. Zjarret kanë përfshirë zona të mëdha në jug dhe jugperëndim të vendit.
Ai vizitoi vendin e një shtëpie të djegur në rajonin e Stara Zagora, duke folur me vendasit dhe vullnetarët që ndihmuan për të luftuar zjarrin.
“Situata për momentin është nën kontroll. Shteti është i gatshëm të ofrojë mbështetje shtesë nëse është e nevojshme përmes Komisionit Ndërinstitucional për Rimëkëmbje dhe Ndihmë”, tha Glavçev, duke theksuar se Bullgaria ka garanci për mbështetje nga Çekia dhe Rumania.
Ka gjithashtu gati dhjetëra zjarre aktive në Maqedoninë e Veriut. Më i përhapuri është në malin Serta, në rajonin e Negotinës. Rreth 700-800 hektarë pyll me pisha janë djegur dhe zjarri ende nuk është vënë nën kontroll.
Qeveria e Maqedonisë së Veriut i kërkoi BE-së që t'i vijë në ndihmë duke aktivizuar mekanizmin e mbrojtjes civile të bllokut.
Avionët zjarrfikës mbërritën nga Turqia, Mali i Zi, Serbia dhe Sllovenia dhe u vendosën në zonat e zjarrit.
Pak ditë më parë edhe Shqipëria u përball me zjarre të shumta në zonën e Dropullit, duke bërë që autoritetet të kërkonin ndihmë nga Bashkimi Evropian për të ndihmuar në trajtimin e zjarreve në jug të vendit.
(A2 Televizion)
A2 CNN Livestream
MUND TE LEXONI GJITHASHTU
