Shërbimi Federal i Sigurisë së Rusisë njoftoi sot se ka kryer kontrolle në 78 rajone të vendit, duke arrestuar 39 persona, përfshirë adoleshentë, me akuzën e mbështetjes së "organizatave terroriste ukrainase" dhe nxitjes së "akteve të dhunshme".
Në total, agjentët e FSB-së, sipas njoftimit të shërbimit të sigurisë, kanë kryer hetime ndaj 252 anëtarëve të "komuniteteve online", ndër të cilët 156 ishin adoleshentë, raporton A2.
Të arrestuarit janë të moshës nga 14 deri në 34 vjeç. FSB pretendon se ata “mbështesin aksionin e organizatave terroriste ukrainase të ndaluara në Rusi, të cilat nxisin fëmijët dhe adoleshentët të kryejnë akte të dhunshme kundër personave që përfaqësojnë autoritetet shtetërore, shokët e tyre të klasës dhe mësuesit", përcjell A2.
Sipas FSB-së, nëntë të mitur u përfshinë në përgatitjen e "sulmeve të armatosura" kundër institucioneve arsimore ose fetare dhe vendeve të frekuentimit masiv. Në njoftim gjithashtu thuhet se janë sekuestruar armë zjarri, municione dhe komponentë të nevojshëm për prodhimin e eksplozivëve, si dhe "material propagandues i organizatave terroriste".
Ndër të tjera, siç thekson FSB në njoftimin e saj, të arrestuarit lidheshin përmes aplikacionit Discord me “guida ukrainase”, shkruan A2.
Në mesazhe ka udhëzime "për akte terroriste të sabotimit, ndërtimin dhe përdorimin e mjeteve të terrorizmit dhe plane për përgatitjen e sulmeve të armatosura".
Agjencitë shtetërore të lajmeve publikuan video të arrestimeve. Në to shihen policia duke futur dy adoleshentë në automjete, me njërin që shihet nga pas, duke ecur përpara me kokë ulur dhe i veshur me pulovër të zezë. “Mos ki frikë, është FBI”, i thotë një agjent tjetër një gruaje që i hapet derës.
Rusia po shton arrestimet e njerëzve të akuzuar për mbështetje ose ndihmë ndaj Ukrainës. Gazeta Kommersant shkroi se aplikacioni Discord ka të ngjarë të bllokohet në Rusi shumë shpejt bazuar në akuzat për shkelje të ligjit.
Autoriteti rregullator i telekomunikacionit pretendon se i ka dërguar menaxherëve të aplikacionit një kërkesë për të hequr 947 përmbajtje që shkelin ligjin "ndër ato që përmbajnë pornografi për fëmijë, thirrje për veprime ekstremiste, tërheqjen e të miturve për të kryer veprime të paligjshme". (A2 Televizion)
A2 CNN Livestream
MUND TE LEXONI GJITHASHTU
