Vetëm pak centimetra larg nga përplasja e dy superfuqive bërthamore. Shtetet e Bashkuara kanë publikuar një video dramatike, ku një avion luftarak rus për pak sa nuk është përplasur me një aeroplan amerikan, pranë Alaskës. Incidenti raportohet të ketë ndodhur javën e kaluar, në hapësirë ajrore ndërkombëtare, shkruan A2 CNN.
Në videon e publikuar nga Departamenti Amerikan i Mbrojtjes, shihet një avion luftarak amerikan F16 që po monitoron lëvizjet e një bombarduesi rus. Më pas, një aeroplan rus fluturon me shpejtësi të lartë shumë pranë atij amerikan, duke bërë manovra të rrezikshme. Departamenti i Mbrojtjes tha se veprimet e pilotit rus ishin jo profesionale dhe të pasigurta.
“Sjellja e pilotit të avionit të Rusisë Su-35 ishte e pasigurt, joprofesionale dhe rrezikonte gjithçka. Kjo nuk ishte diçka që mund të shihej në një forcë ajrore profesionale”, tha Gregory Guillot, Gjeneral i Forcave Ajrore të SHBA.
Ministria ruse e mbrojtjes nuk ka reaguar lidhur me akuzat e Forcës Ajrore të Shteteve të Bashkuara. Sipas mediave në Moskë, vetëm është raportuar fluturimi i bombarduesit strategjik pranë Alaskës mbi hapësirën neutral ajrore.
Ushtria ruse thotë se fluturimi ka zgjatur më shumë se 11 orë dhe se bombarduesi shoqërohej nga 4 avionë luftarakë. Kjo nuk është hera e parë që dy superfuqitë globale që posedojnë armë bërthamore hasin në incidente të tilla. Por rreziku tashmë është dhe më i lartë që këto episode të mund të shkaktojnë ndonjë problem më të madh, duke marrë parasysh që raportet mes Rusisë dhe Shteteve të Bashkuara janë në minimumin historik që prej Luftës së Ftohtë. (A2 Televizion)
A2 CNN Livestream
MUND TE LEXONI GJITHASHTU
