Një kirurg vaskular i Shërbimit Shëndetësor Kombëtar në Mbretërinë e Bashkuar, i cili kishte kryer qindra operacione amputimi dhe më vonë kishte hequr vetë këmbët e tij, është dënuar me dy vite e tetë muaj burg për mashtrim dhe posedim të pornografisë ekstreme.
Neil Hopper, 49 vjeç, nga Truro, Cornwall, kishte pretenduar para kompanive të sigurimeve se amputimi i këmbëve të tij kishte ndodhur për shkak të një infeksioni nga sepsi. Megjithatë, Gjykata e Kurorës në Truro dëgjoi se Hopper kishte përdorur akull të thatë për të ngrirë vetë këmbët e tij, duke bërë që amputimi të bëhej i pashmangshëm.
Prokurori Nicholas Lee tha në gjykatë se Hopper kishte një "interes seksual në amputim". Ai kishte pranuar fajësinë për dy akuza për mashtrim dhe tre akuza për posedim të pornografisë ekstreme, duke përfshirë video me përmbajtje të rëndë të gjymtimit trupor.
Gjyqtari James Adkin tha gjatë dhënies së dënimit se, ndonëse Hopper ishte penduar dhe nuk kishte më parë precedentë penalë, "niveli i dëmit" në videot e pornografisë ishte "jashtëzakonisht i lartë".
Në maj të vitit 2019, Hopper iu nënshtrua amputimit të të dy këmbëve poshtë gjurit, pasi ishte paraqitur në spital me dhimbje të forta. Ai u trajtua për sepsi të dyshuar, por nuk i tregoi mjekëve se kishte shkaktuar vetë dëmtimet që çuan në amputim.
Rasti ka shkaktuar tronditje të madhe, jo vetëm për shkak të profesionit të tij si kirurg i respektuar, por edhe për natyrën e pazakontë dhe shqetësuese të krimeve të tij. (A2 Televizion)
A2 CNN Livestream
MUND TE LEXONI GJITHASHTU
