“Ne do të vazhdojmë të godasim pa mëshirë Hezbollahun”. Kështu është shprehur Kryeministri i Izraelit, Benjamin Netanyahu, nga baza ushtarake e cila u godit nga Hezbollahu dhe që u mori jetën katër ushtarëve izraelitë.
“Dua të jem i qartë. Ne do të vazhdojmë të godasim pa mëshirë Hezbollahun në të gjitha pjesët e Libanit, përfshirë Bejrutin. Ne e kemi demonstruar këtë kohët e fundit dhe do të vazhdojmë ta demonstrojmë këtë edhe në ditët në vijim”, shtoi Netanyahu.
I ashpër ishte edhe reagimi i ministrit izraelit të Mbrojtjes, Yoav Gallant, i cili i tha homologut të tij amerikan Lloyd Austin se Izraeli do t'i jepte një “përgjigje të fuqishme” Hezbollahut. Gallant foli me Austin dhe “theksoi ashpërsinë e sulmit dhe përgjigjen e fuqishme që do të merrej kundër Hezbollahut”, thuhet në deklaratë.
Ndërkohë, Departamenti Amerikan i Mbrojtjes tha se gjatë telefonatës, Austin “ripohoi angazhimin e thellë të SHBA-së për sigurinë e Izraelit” dhe shprehu rëndësinë e “një rruge diplomatike për të ofruar siguri për civilët në të dy anët e kufirit”.
Si hakmarrje të sulmeve të Hezbollahut, Izreli lëshoi një sulm të rrufeshëm në qytetin Aito, qytet me shumicë të krishterë në veri të Libanit, duke lënë të vdekur 22 persona.
Sakaq, ushtria izraelite ka zbuluar një bazë të madhe nëntokësore të forcave elitare të Hezbollahut, në Libanin jugor, 800 metra e gjerë. Brenda kompleksit, IDF gjeti raketa helikopterësh, predha mortajash, motoçikleta, strehim dhe automjete për qëndrime të gjata.
Hezbollahu, deklaroi ushtria, synonte t'i përdorte këto armë në planin e tij “Pushtimi i Galilesë”, duke fshehur qendrën e komandës nën një zonë civile. Zëdhënësi i IDF-së Daniel Hagari në një video tregon “motoçikletat me të cilat Hezbollahu po planifikonte të hynte në qytetet izraelite të Kiryat Shmona dhe vende të tjera për të kryer një masakër”. (A2 Televizion)
A2 CNN Livestream
MUND TE LEXONI GJITHASHTU
