Sulmet ajrore ruse në qytetin ukrainas të Kharkivit kanë vrarë të paktën pesë punonjës të ekipeve të shpëtimit, njoftuan autoritetet lokale mbrëmë, ndërsa disa qytete të mëdha në të gjithë vendin, përfshirë kryeqytetin Kiev, u goditën nga sulme masive.
"Pesë shpëtimtarë të shërbimeve shtetërore të emergjencës u vranë nga sulmet ajrore të përsëritura ruse gjatë luftimit të zjarreve; të paktën pesë të tjerë u plagosën", shkroi Ministri i Brendshëm ukrainas Igor Klymenko në Telegram.
Një nga ndërtesat fetare në kompleksin e famshëm Kiev-Pechersk Lavra është në flakë pas një sulmi masiv në kryeqytetin ukrainas mbrëmë, njoftuan autoritetet lokale, ndërsa disa qytete të mëdha janë në shënjestër të forcave ruse.
Kryebashkiaku Vitali Klitschko raportoi një zjarr në çatinë e Katedrales së Zonjës së Shën Mërisë, një nga kishat në kompleksin e njohur të krishterë ortodoks. Kreu i administratës ushtarake lokale, Timur Tkachenko, e dënoi sulmin, duke e quajtur atë një "sulm të drejtpërdrejtë" kundër vendit.
"Ne kërkojmë lutje për të shpëtuar këtë vend të shenjtë nga shkatërrimi", tha Mitropoliti Epifani i Kievit, primat i Kishës Ortodokse Ukrainase, duke e denoncuar incidentin si një "krim kundër njerëzimit, historisë dhe Krishterimit".
Klitschko raportoi gjithashtu 18 të plagosur, 11 prej të cilëve u shtruan në spital, dhe se 140,000 banorë të Kievit verior mbetën pa energji elektrike. (A2 Televizion)
A2 CNN Livestream
MUND TE LEXONI GJITHASHTU
