Spanja ka nisur tre ditë zie kombëtare, pasi të paktën 68 persona humbën jetën dhe dhjetëra të tjerë u plagosën në një prej aksidenteve më të rënda hekurudhore në historinë moderne të Evropës.
Ekipet e emergjencës punuan gjatë gjithë natës, nën ndriçimin e fuqishëm të projektorëve, për të prerë vagonët metalikë dhe për të kërkuar viktimat. Shumë prej personave që humbën jetën në aksident ende nuk janë identifikuar.
Autoritetet po hetojnë shkaqet e tragjedisë, e cila ndodhi të mërkurën në mëngjes, kur një tren që udhëtonte nga Madridi drejt Seviljes u përplas me shpejtësi me një tren tjetër që ishte i ndaluar në shina.
Kryeministri Pedro Sánchez deklaroi se “e gjithë Spanja është në zi”, duke shtuar se “jetët janë shkatërruar, familjet janë ndarë dhe dhimbja është e pamasë”, përcjell A2CNN.
Sipas Ministrisë së Brendshme të Spanjës, qindra efektivë dhe punonjës të shërbimeve të emergjencës janë angazhuar në vendngjarje për të ndihmuar në operacionet e kërkim-shpëtimit. Për gjetjen e viktimave dhe largimin e rrënojave po përdoren dronë dhe helikopterë.
Treni që operohej nga kompania private hekurudhore Iryo, kishte 147 pasagjerë në bord. Sipas ministrit spanjoll të Transportit, Óscar Puente, treni kishte ndaluar në shina për shkak të një defekti në sistemin kompjuterik.
Ai tha se, në rast të një defekti në sistem, kontrollin e merr një qendër monitorimi 24-orëshe në Madrid. Megjithatë, kjo qendër kishte marrë një vendim “të pashpjegueshëm”, duke udhëzuar trenat të rifillonin lëvizjen pa asnjë kufizim shpejtësie.
Regjistrimet audio të komunikimeve mes kontrollorëve të trenave në Madrid dhe makinistëve duket se tregojnë se njërit prej trenave me shpejtësi të lartë i ishte dhënë leja për të lëvizur, edhe pse një tren tjetër përpara tij kishte ndaluar.
Kompania Iryo deklaroi se treni i saj “u godit nga pas” nga një tren tjetër, i operuar nga kompania shtetërore hekurudhore e Spanjës, Renfe, i cili kishte 397 pasagjerë në bord. Fuqia e përplasjes bëri që disa vagonë të përfundonin në një skarpatë.
Dëshmitarët treguan se kishin parë njerëz duke qarë dhe me gjak, pasagjerë të bllokuar në sediljet e tyre dhe tym që përhapej nëpër vagonë, njëri prej të cilëve mori flakë.
Sánchez tha se ishte “e papranueshme” që Spanja të përballej me dy aksidente të rënda hekurudhore brenda një viti, pasi një përplasje e trenave me shpejtësi të lartë në janar, pranë Kordobës, shkaktoi 46 viktima. Aksidenti ndodhi në të njëjtën linjë hekurudhore ku u regjistrua edhe përplasja e së mërkurës, por shumë më në jug.
Shumica e partive politike pezulluan fushatat për zgjedhjet e ardhshme pas aksidentit.
Përjashtim bëri partia e ekstremit të djathtë Vox. Kreu i saj, Santiago Abascal, deklaroi se partia nuk do të bëhej pjesë e përpjekjeve që, sipas tij, synojnë të “përdorin zinë për të heshtur kritikat” ndaj infrastrukturës hekurudhore të vendit. (A2 Televizion)
A2 CNN Livestream
MUND TE LEXONI GJITHASHTU
