Franca do të përforcojë policinë me trupa shtesë dhe do të ndërmarrë një operacion të gjerë sigurie për protestat e tjera të planifikuara për të shtunën. Kështu njoftoi qeveria të martën, duke pranuar mangësi në reagimin e saj ndaj dhunës së fundjavës së kaluar.
"Angazhimi i forcave të shtunën e ardhshme do të jetë masiv," deklaroi kryeministri Sebastien Lecornu, duke shtuar se prioriteti i menjëhershëm është rivendosja e rendit, pasi trazirat dhe plaçkitjet përfshinë Parisin, Marsejën, Lionin dhe qytete të tjera më 17 tetor, shkruan A2.
“Po, ne do t’i dislokojmë forcat e ‘Operation Sentinelle’ – natyrisht – për të zëvendësuar forcat e sigurisë së brendshme, kryesisht në detyra të sigurisë statike, me qëllim që të lirohen oficerët e policisë dhe xhandarët për të kryer detyrat që lidhen me rendin publik”, tha Sebastien Lecornu, Kryeministër i Francës.
Ministri i Brendshëm Laurent Nunez tha se ushtria do të vendoset së bashku me policinë, ndërsa qeveria u zotua të rishikojë taktikat pas kritikave të përhapura se qendrat e qyteteve ishin lënë të cenueshme. Nunez kërkoi falje për gabimet. "Më vjen shumë keq për atë që ndodhi. Pranoj pjesën time të përgjegjësisë", tha ai.
Duke e paraqitur krizën si një zgjedhje “midis dhunës dhe Republikës”, Lecornu fajësoi për trazirat grupet e ekstremit të majtë, të cilat nga ana tjetër kanë akuzuar qeverinë për nënvlerësim të zemërimit publik për shkak të kostove të larta të jetesës dhe rënies së shërbimeve publike.
Trazirat tronditën Francën për shkak të shkallës së tyre dhe pamundësisë së dukshme të policisë për ta përmbajtur atë, duke ndezur tensione përpara zgjedhjeve presidenciale vitin e ardhshëm, me kandidatët nga e djathta ekstreme dhe e majta ekstreme që performuan fuqishëm në sondazhe. (A2 Televizion)
A2 CNN Livestream
MUND TE LEXONI GJITHASHTU
