Një sulm ajror rus gjatë natës mbi Kievin dhe rajonin e tij vrau dy persona, thanë autoritetet e Ukrainës të hënën, në atë që duket të jetë vdekja e parë e raportuar në sulmet ruse në kryeqytetin ukrainas këtë vit. Shërbimi Shtetëror i Emergjencave i Ukrainës tha se sulmi i vuri flakën një objekti mjekësor në lagjen Obolonskyi në sektorin verior të Kievit, ku funksiononte një repart për pacientë të shtruar. Pasi zjarri u shua, një trup u gjet brenda, shtuan autoritetet.
Një grua u plagos gjithashtu dhe 25 persona u evakuuan, tha shërbimi në aplikacionin e mesazheve Telegram. Ai publikoi një foto që tregonte ndihmësit e emergjencës duke transportuar një trup në barelë pranë një ambulance jashtë një ndërtese, me borë në tokë, përcjell A2.
Rusia gjithashtu goditi qytete dhe fshatra në të gjithë rajonin e Kievit, duke dëmtuar shtëpi dhe infrastrukturë kritike, dhe duke vrarë një civil në lagjen Fastiv, në jugperëndim të kryeqytetit, tha guvernatori i rajonit Mykola Kalashnyk në Telegram. Pjesë të vogla të rajonit mbetën pa energji elektrike, shtoi Kalashnyk. Nuk pati asnjë koment të menjëhershëm nga Rusia. Të dyja palët mohojnë se kanë synuar civilët në sulmet e tyre.
Rusia ka sulmuar vazhdimisht Kievin dhe qytete të tjera ukrainase me raketa dhe dronë gjatë luftës gati katërvjeçare, duke thënë se godet objektiva ushtarake, ndërsa Ukraina thotë se shpesh goditen civilët dhe infrastruktura civile.
Ndërkohë Presidenti i SHBA-së, Donald Trump, u tha gazetarëve në Air Force One se nuk besonte që Ukraina goditi rezidencën e udhëheqësit rus, Vladimir Putin. "Nuk besoj se ky sulm ndodhi", u përgjigj Trump, duke vënë në dukje se "askush nuk e dinte në atë kohë" nëse raporti ishte i vërtetë. Moska fajëson Kievin për sulmin e pretenduar. (A2 Televizion)
A2 CNN Livestream
MUND TE LEXONI GJITHASHTU
