Presidenti i Turqisë planifikon të udhëtojë në Siri për bisedime me regjimin e ri në fillim të vitit 2025, duke kërkuar kryesisht bashkëpunim në trajtimin e forcave kurde.
Në një fjalim të rëndësishëm në Samitin e D8, grupi i shteteve të zhvilluara islamike ku bëjnë pjesë Egjipti, Irani, Indonezia, Malajzia, Bangladeshi, Nigeria, Pakistani dhe Turqia, Rexhep Tajip Erdogan u fokusua në çështjen e Sirisë dhe zbuloi në mënyrë indirekte planet e tij për rajonin.
Presidenti i Turqisë nga Kajro tha se vendosja e një armëpushimi në Liban dhe rënia e regjimit të Asadit në Siri do të jenë, "fillimi i një periudhe më pozitive".
“Ne duhet të marrim drejtimin në zhvillimin e dinamikave të reja, për të siguruar paqen e brendshme në Palestinë, Liban dhe Siri dhe për të ndërmarrë hapa pionierë kundër Izraelit, i cili vazhdon sulmet e tij me mbështetjen e hapur të Shteteve të Bashkuara”, pohoi Erdogan.
Siç duket gjithçka po përgatitet për vizitën e tij të parë zyrtare në Damask, teksa janë konfirmuar kontaktet e tij me regjimin e al-Jolanit.
Sipas mediave turke dhe burimeve në Damask, ai do të vizitojë Damaskun pas 15 ditësh dhe mund të falet në Xhaminë e Madhe “Umajad”. Ai do të takohet me udhëheqësin e HTS dhe vizita e tij në thelb do të jetë njohja e Ankarasë për udhëheqjen e re të udhëhequr nga al-Jolani.
Bloomberg në Ankara raportoi dje se qeveria turke tashmë po shqyrton edhe mundësinë që së shpejti të heqë liderët e rinj të Sirisë nga lista e anëtarëve të organizatave terroriste, pa pritur hapa të ngjashëm nga vende të tjera ose Kombet e Bashkuara.
Me gjithë nxitjet amerikane drejtuar Ankarasë për të mos shqetësuar kurdët e Sirisë, udhëheqja turke duket se ka përgatitur tashmë hapat e saj të ardhshëm. Sipas një kolumnisti të gazetës Hurriyet, programi për Sirinë është finalizuar dhe më 1 mars 2025 do të krijohet një qeveri e përkohshme, e cila do të njihet nga populli dhe do të krijohet një asamble kushtetuese për hartimin dhe ratifikimin e Kushtetutës së re.
Pas 1 marsit do të fillojë edhe procesi i çarmatimit të forcave kurdë në rajonet veriore të Sirisë.
Udhëheqja e re siriane do t'u bëjë thirrje të gjitha grupeve të armatosura në Siri që të lënë armët dhe do të krijohet një mekanizëm monitorues gjatë procesit të çarmatimit. Jo-sirianët brenda PKK-YPG kurdë do të duhet të largohen nga vendi, si dhe udhëheqja e organizatës. Anëtarët e PKK-YPG që dorëzojnë armët e tyre do të mund të bashkohen me ushtrinë siriane.
Kreu i YPG-së, Mazloum Kobani, dëshiron që rajoni i tij të mbetet nën mbikëqyrjen e SHBA-së, por sipas Hurriyet, plani i ri është të vendosë rajonin kurd nën kontrollin e qeverisë së re siriane dhe Turqisë. (A2 Televizion)
A2 CNN Livestream
MUND TE LEXONI GJITHASHTU
