Franca po i bën presion Gjermanisë që të sqarojë se si do t’i përdorë raketat me rreze të gjatë veprimi në një konflikt të mundshëm me Rusinë, mes shqetësimeve se Moska mund të keqinterpretojë sulmet konvencionale dhe të përgjigjet me armë bërthamore. Kështu raporton prestigjiozja Financial Times, duke cituar zyrtarë të njohur me diskutimet.
Zyrtarët francezë dhe gjermanë po zhvillojnë bisedime që synojnë përafrimin e qasjes së Berlinit ndaj armëve konvencionale me rreze të gjatë veprimi me strategjinë e Francës për parandalimin bërthamor, shkruan A2 CNN. Parisi ka frikë se një sulm me raketa konvencionale kundër një objektivi rus mund të keqinterpretohet nga Moska, duke shkaktuar potencialisht përshkallëzim bërthamor.
Diskutimet vijnë ndërsa Gjermania dhe vende të tjera evropiane zgjerojnë aftësitë e tyre të sulmeve me rreze të gjatë veprimi në përgjigje të kërcënimit në rritje nga Rusia.
Berlini po blen dhe po zhvillon raketa të lëshuara nga toka me rreze veprimi nga 500 deri në më shumë se 2,000 kilometra, duke i dhënë asaj potencialin për të goditur objektiva thellë brenda territorit rus. Franca është veçanërisht e shqetësuar se si këto armë do të përshtateshin në konceptin e Presidentit Emmanuel Macron për zgjerimin e mbrojtjes bërthamore franceze tek partnerët evropianë.
Zyrtarët francezë kanë frikë se Moska mund ta mbajë Parisin përgjegjës për sulmet konvencionale të kryera nga vende të tjera evropiane sipas një marrëveshjeje më të gjerë parandaluese.
Një zyrtar francez i tha FT se Franca kishte zhvilluar "gramatikën dhe fjalorin" e saj bërthamor - një kuptim të vendosur se si të komunikohen rreziqet e parandalimit dhe përshkallëzimit - që Gjermania dhe aleatët e tjerë evropianë jo-bërthamorë nuk e kanë.
Një zyrtar i lartë gjerman pranoi nevojën që vendet evropiane të zhvillojnë një kuptim të përbashkët se si duhet të përdoren armët me rreze të gjatë veprimi dhe si të menaxhojnë rreziqet e përshkallëzimit bërthamor.
Franca dhe Mbretëria e Bashkuar janë dy fuqitë bërthamore të Evropës, ndërsa Gjermania, Polonia, shtetet baltike dhe vendet skandinave janë ndër ato që po forcojnë aftësitë e tyre konvencionale me rreze të gjatë veprimi. (A2 Televizion)
A2 CNN Livestream
MUND TE LEXONI GJITHASHTU
