Rusia deklaroi të mërkurën se plani i Francës për të zgjeruar arsenalin e saj bërthamor është një lëvizje shumë destabilizuese që paraqet një kërcënim të mundshëm për Moskën. Presidenti francez Emmanuel Macron e njoftoi planin të hënën, duke thënë se edhe vende të tjera europiane do të mund të marrin pjesë në stërvitjet bërthamore franceze. Franca dhe Gjermania njoftuan gjithashtu se kanë krijuar një grup drejtues bërthamor për të diskutuar çështjet e parandalimit, shkruan A2 CNN. Macron kishte deklaruar për herë të parë në mars 2025 se do të niste një dialog strategjik për zgjerimin e mbrojtjes së “çadrës bërthamore” franceze ndaj aleatëve europianë, të cilët deri tani janë mbështetur te Shtetet e Bashkuara.
Zëdhënësja e Ministrisë së Jashtme ruse, Maria Zakharova, u tha gazetarëve se njoftimi i Macron këtë javë ishte “një zhvillim jashtëzakonisht destabilizues”. Sipas saj, kjo përfaqëson “një forcim dhe zgjerim të konsiderueshëm të potencialit bërthamor të NATO-s, i cili, në rast të një konflikti të drejtpërdrejtë ushtarak me Rusinë, mund të përdoret në mënyrë të koordinuar kundër vendit tonë”.
Ndërkohë zëdhënësi i Kremlinit, Dmitry Peskov, tha se lëvizja franceze përforcon qëndrimin e Moskës se armët bërthamore të Francës dhe Britanisë duhet të jenë pjesë e çdo negociate të ardhshme mbi balancën globale bërthamore.
Rusia ka deklaruar se është e hapur për bisedime të tilla pas mbarimit të traktatit New START muajin e kaluar, marrëveshja e fundit dypalëshe që kufizonte numrin e kokave bërthamore strategjike dhe raketave të Rusisë dhe Shteteve të Bashkuara. (A2 Televizion)
A2 CNN Livestream
MUND TE LEXONI GJITHASHTU
