Irani ka deklaruar se do t’u lejojë anijeve japoneze të kalojnë nëpër Ngushticën e Hormuzit, në një shenjë të fundit se Teherani ka nisur të ndjekë një bllokadë selektive të kësaj rruge ujore strategjike.
“Nuk e kemi mbyllur ngushticën. Sipas nesh, ajo është e hapur. Është e mbyllur vetëm për anijet që u përkasin armiqve tanë, vendeve që na sulmojnë. Për vendet e tjera, anijet mund të kalojnë,” tha ministri i Jashtëm iranian, Abbas Araghchi, për Kyodo News të Japonisë të premten në mbrëmje.
“Po komunikojmë me ta për të gjetur një mënyrë kalimi të sigurt. Jemi të gatshëm t’u ofrojmë kalim të sigurt. Gjithçka që duhet të bëjnë është të na kontaktojnë për të diskutuar si do të realizohet kjo rrugë,” shtoi ai.
Japonia siguron më shumë se 90 për qind të importeve të saj të naftës bruto nga Lindja e Mesme dhe është shumë e varur nga eksportet që kalojnë nëpër këtë ngushticë. Megjithatë, kjo rrugë ujore është mbyllur de facto që kur Shtetet e Bashkuara dhe Izraeli sulmuan Iranin më 28 shkurt.
Forcat e Gardës Revolucionare Islamike të Iranit kishin paralajmëruar në ditët e para të luftës se do të “digjnin” çdo anije që do të përpiqej të kalonte, duke e çuar trafikun detar pothuajse në ndalim.
Megjithatë, gjatë javës së fundit, Irani ka zbutur retorikën, duke deklaruar se ngushtica është e mbyllur vetëm për armiqtë e tij.
Japonia mund të bashkohet së shpejti me një grup të vogël vendesh, kryesisht Kina, India dhe Pakistani, anijet e të cilave janë lejuar të kalojnë ditët e fundit me miratimin e autoriteteve iraniane.
Sipas Lloyd’s List, një shërbim informacioni për transportin detar, 10 anije kanë kaluar ngushticën duke lundruar pranë bregdetit iranian, një rrugë që po shfaqet si një “korridor i sigurt” për transportin. Anija më e fundit, një transportues grek mallrash, kaloi të premten pranë ishullit iranian Larak, duke transmetuar mesazhin “Ngarkesë ushqimore për Iranin”.
Ndërkohë që kalimet janë bërë rast pas rasti, raportohet se Garda Revolucionare po zhvillon një sistem më të koordinuar verifikimi dhe regjistrimi për anijet.
Ndërsa lufta ndaj Iranit hyn në javën e tretë, disa vende, përfshirë aleatë të SHBA-së, kanë nisur të ushtrojnë presion ndaj Teheranit për rihapjen e ngushticës ose për lejimin e kalimit të sigurt të anijeve të tyre.
Japonia, Franca, Gjermania, Italia, Holanda dhe Mbretëria e Bashkuar publikuan më herët këtë javë një deklaratë të përbashkët ku shprehin gatishmërinë për të kontribuar në përpjekjet për garantimin e kalimit të sigurt nëpër Ngushticën e Hormuzit.
Ndërkohë, Iraku, Malajzia, Kina, India dhe Pakistani thuhet se kanë zhvilluar bisedime të drejtpërdrejta me Teheranin për këtë çështje.
Komentet e Araghchit vijnë pas një bisede telefonike me ministrin e Jashtëm japonez, Toshimitsu Motegi, gjatë së cilës Tokio shprehu shqetësim për numrin e madh të anijeve japoneze të bllokuara aktualisht në Gjirin Persik. (A2 Televizion)
A2 CNN Livestream
MUND TE LEXONI GJITHASHTU
