''Koha për ndryshim regjimi'', flet djali i shahut të fundit të Iranit

Djali i Shahut të fundit të Iranit tha se dobësimi i regjimit i ka dhënë popullit iranian një mundësi për të "çliruar më në fund veten".

Duke folur në një intervistë për BBC-në, Reza Pahlavi tha se është krijuar një valë e re shprese dhe energjie si rezultat i sulmeve të vazhdueshme me raketa midis Iranit dhe Izraelit, një situatë në të cilën qytetarët mund të ngrihen për të bërë ndryshimin.

Ndërkohë, ministri i Jashtëm iranian Abas Araki tha se sulmet e Izraelit synonin sabotimin e bisedimeve bërthamore me SHBA-në që do të rifillonin të dielën në Oman, por të cilat tani janë anuluar.

Ai tha se sulmet e Izraelit kishin mbështetjen e SHBA-së dhe se Irani po vepronte vetëm për vetëmbrojtje, çka me herët është mohuar nga presidenti Trump kur tha se Amerika nuk dinte asgjë për sulmin izraelit. (A2 Televizion)