Marrëveshja e fundit për armëpushim mes SHBA-së dhe Iranit nuk po shihet si një hap drejt paqes së qëndrueshme, por më shumë si një zgjidhje e përkohshme që ka nxjerrë në pah tensione të forta brenda vetë Iranit. Edhe pse autoritetet iraniane e kanë paraqitur si një fitore strategjike, reagimet në vend tregojnë një realitet shumë më të ndërlikuar.
Brenda establishmentit iranian, sidomos tek grupet e linjës së ashpër, marrëveshja është pritur me pakënaqësi. Ata besojnë se Irani kishte arritur një pozicion të fortë në konflikt dhe se ndalimi i përkohshëm i luftës i jep kohë kundërshtarëve për t’u riorganizuar. Për këtë arsye, armëpushimi shihet nga këto rryma si një lëshim ndaj presionit ndërkombëtar, jo si një sukses.
Nga ana tjetër, një pjesë e udhëheqjes politike e ka konsideruar këtë marrëveshje si një domosdoshmëri. Pas një konflikti të gjatë dhe me pasoja të rënda me mijëra viktima dhe dëme serioze në infrastrukturë nevoja për të shmangur përshkallëzim të mëtejshëm është bërë e qartë. Kjo ka krijuar një ndarje mes pragmatistëve, që kërkojnë stabilitet, dhe radikalëve që favorizojnë vazhdimin e konfrontimit.
Një zhvillim i rëndësishëm lidhet edhe me ndryshimet në lidershipin iranian. Qasja më fleksibile ndaj negociatave, përfshirë edhe kontaktet direkte me SHBA-në, tregon një devijim nga linja tradicionale e mëparshme. Kjo sugjeron se presioni i luftës dhe rreziku për dëme më të mëdha kanë detyruar Teheranin të rishikojë strategjinë e tij.
Megjithatë, pavarësisht armëpushimit, tensionet mbeten të larta. Marrëveshja është e kufizuar në kohë dhe nuk zgjidh asnjë nga çështjet themelore që kanë çuar në konflikt. Bisedimet që pritet të zhvillohen mund të hapin rrugë për dialog, por mungesa e besimit dhe interesat e kundërta e bëjnë të pasigurt çdo përparim real.
Në thelb, situata tregon se Lindja e Mesme mbetet në një ekuilibër të brishtë. Armëpushimi mund të ketë ndalur përkohësisht përplasjen direkte, por tensionet politike dhe ndarjet e brendshme tregojnë se konflikti është larg zgjidhjes./BBC/ (A2 Televizion)
A2 CNN Livestream
MUND TE LEXONI GJITHASHTU
