Irani ka përjetuar një tjetër natë ferri. Shpërthime të fuqishme kanë ndodhur një nga aeroportet kryesore tregtare të Tehranit, ndërsa dëshmitarët raportojnë për një avion në flakë në pistë. Sulmet vijnë pasi Izrael njoftoi nisjen e një vale të re bombardimesh kundër Iranit.
Sipas ushtrisë së Tel Avivit, mbi 80 avionë luftarakë morën pjesë në operacionet ajrore kundër infrastrukturës ushtarake iraniane. Mes objektivave të goditura ishte edhe universiteti ushtarak i Gardës Revolucionare, ku trajnohen oficerët e kësaj force.
Izraeli deklaron gjithashtu se janë goditur depo raketash dhe një bazë nëntokësore balistike ku operonin qindra ushtarakë. Ndërkohë Irani ka vazhduar kundërpërgjigjen me raketa dhe dronë drejt territorit izraelit. Sirena alarmi janë dëgjuar gjatë natës në Jerusalem dhe Tel Aviv, ndërsa sistemi i mbrojtjes ajrore ka rrëzuar shumicën e raketave.
Ushtria iraniane tha në një deklaratë se marina e saj nisi një valë masive sulmesh me dronë, me zjarr të rëndë, duke synuar bazat amerikane në Abu Dhabi dhe Kuvajt në orët e para të mëngjesit. Azerbajxhani së shpejti do të hyjë në luftë kundër Iranit. Autoritetet izraelite e parashikojnë këtë, sipas një raportimi nga televizioni lokal “Channel 11”.
Më parë, disa media izraelite kishin ngritur mundësinë e përfshirjes së shteteve të Gjirit si Katari, Arabia Saudite dhe Emiratet e Bashkuara Arabe, si dhe grupeve kurde aktive në Irak. Megjithatë, Garda Revolucionare njoftoi në një deklaratë se kishte sulmuar dhe “grupet separatiste” të pranishme në Kurdistanin irakian.
“Nëse grupet separatiste veprojnë kundër integritetit territorial të Iranit, ne do t'i shkatërrojmë ato”, lexohet në deklaratë, ndërsa ka pasur raportime se SHBA po mbështet kurdët e Irakut për një veprimtari tokësore brenda Iranit. (A2 Televizion)
A2 CNN Livestream
MUND TE LEXONI GJITHASHTU
