Pakistani nisi sulme ajrore dhe dërgoi trupa tokësore në provincat afgane përgjatë kufirit të saj perëndimor të dielën, duke vrarë dhjetëra civilë.
Qeveria talebane e Afganistanit e dënoi dhe e quajti sulmin një akt frikacak dhe krim mizor.
Sipas zyrtarëve talebanë, të paktën 100 persona janë vrarë ose plagosur, megjithëse këto shifra nuk janë konfirmuar në mënyrë të pavarur.
Nga ana tjetër, ministri pakistanez i Informacionit, Attaullah Tarar, deklaroi se në sulme u vranë 29 militantë, duke theksuar se objektivat ishin strehimet e grupeve të armatosura dhe se operacioni ishte përgjigje ndaj sulmeve të fundit terroriste në Pakistan.
Islamabadi akuzon prej kohësh Kabulin për strehimin e militantëve që kryejnë sulme në territorin pakistanez, ndërsa qeveria talebane i mohon këto pretendime dhe akuzon Pakistanin për sulme të paprovokuara që godasin civilët.
Sipas autoriteteve afgane, bombardimet goditën shtëpi banimi, ndërsa Pakistani këmbëngul se objektivat ishin baza të militantëve në provincat Paktia, Paktika dhe Kunar. Viktimat më të shumta u raportuan në fshatin Mandikhel, në provincën Paktika.
Përshkallëzimi i fundit vjen një ditë pasi tre anëtarë të forcës paraushtarake pakistaneze Sindh Rangers u vranë në një sulm vetëvrasës në Karaçi. Në atë sulm humbën jetën edhe tre militantë, ndërsa një i dyshuar i katërt, shtetas afgan, u arrestua.
Përgjegjësinë për sulmin e mori Jamaat-ul-Ahrar, një fraksion i ndarë nga Talebanët e Pakistanit (TTP). Të dy grupet janë të shpallura organizata terroriste nga Pakistani dhe Kombet e Bashkuara.
Pavarësisht armëpushimit të arritur në tetor të vitit të kaluar, përplasjet përgjatë kufirit mes dy vendeve kanë vijuar. Në muajt e fundit janë regjistruar disa incidente të përgjakshme, përfshirë përleshjet e shkurtit dhe sulmet ajrore të Pakistanit në qershor, të cilat, sipas Islamabadit, kishin në shënjestër militantët, ndërsa autoritetet afgane raportuan edhe viktima civile, kryesisht fëmijë. (A2 Televizion)
A2 CNN Livestream
MUND TE LEXONI GJITHASHTU
