Pas përmbytjeve katastrofike, Spanja përgatitet për të tjera reshje

Banorët në Spanjë përgatiten për reshje të tjera të dendura, pas përmbytjeve katastrofike. Rajonet e prekura rëndë si Valencia dhe Kastejon konsiderohen si ndër më të rrezikuarat. Të paktën 200 persona kanë humbur jetën nga vërshimet e ujit që erdhën si pasojë e shirave rekord.

Ekipet e emergjencës po punojnë për të rikthyer në funksion shërbimet bazike në Valencia, raporton El Pais. Kreu i këtij rajoni, Karlos Mazon, njofton se dëmet kapin vlerën e 250 milionë eurove.

Zyrtarët spanjollë nuk kanë bërë të ditur një bilanc përfundimtar të personave të zhdukur, duke theksuar se janë shumë. Ekipet e kërkim shpëtimit po gërmojnë në baltën që përmbytja masive la pas në Valencia. Me kalimin e orëve, shpresat për të gjetur të mbijetuar po veniten. (A2 Televizion)