Sekretari i Shtetit i SHBA-së, Marco Rubio, ka këmbëngulur se plani i propozuar për t'i dhënë fund luftës në Ukrainë, i cili është parë gjerësisht si i favorshëm për Rusinë, është "shkruar nga SHBA-ja". Kjo vjen pasi një grup senatorësh thanë se Rubio u kishte thënë se drafti - të cilin njëri tha se e përshkroi si një "listë dëshirash" ruse, nuk pasqyronte qëndrimin e Uashingtonit. Më vonë, Rubio u distancua nga këto pretendime dhe tha se plani vinte nga SHBA-ja dhe ishte "bazuar në kontributin" si nga Rusia ashtu edhe nga Ukraina.
Ndërhyrja e tij erdhi ndërsa ai fluturoi për në Gjenevë të Zvicrës për bisedime me zyrtarët e sigurisë ukrainas dhe evropianë mbi planin, të cilin Presidenti i SHBA-së, Donald Trump, i ka bërë thirrje Kievit që ta pranojë shpejt, shkruan A2 CNN. Aleatët e Ukrainës në Evropë kanë kundërshtuar dispozitat kryesore në draft, i cili nuk është bërë publik, por detajet e të cilit janë publikuar gjerësisht.
Ai përfshin Ukrainën që pranon të tërheqë trupat nga zonat lindore të cilat Rusia nuk ka qenë në gjendje t'i marrë me forcë, dhe të kufizojë madhësinë e forcave të saj të armatosura.
Presidenti Donald Trump ka vijuar të ushtroi presion mbi Presidentin ukrainas Volodymyr Zelensky, duke thënë se ai mund të bjerë dakord me propozimin e paqes të Shtëpisë së Bardhë deri të enjten, ose "të vazhdojë të luftojë me gjithë zemër". Komenti, i bërë për gazetarët në Uashington, është pjesë e një përpjekjeje të Shtëpisë së Bardhë për të bindur udhëheqësit e Ukrainës të bien dakord për një plan prej 28 pikash për t'i dhënë fund luftës së saj me Rusinë. Ai ka tërhequr kritika, përfshirë edhe nga ligjvënësit republikanë, për favorizimin e Moskës.
Megjithatë, të shtunën, Trump sinjalizoi njëfarë fleksibiliteti me Zelensky-n. Kur u pyet nëse kjo është oferta e tij e fundit për Ukrainën, Trump tha: "Jo", duke shtuar: "Do të doja të arrija paqen. Duhet të kishte ndodhur shumë kohë më parë. ... Po përpiqemi ta përfundojmë. Në një mënyrë ose në një tjetër duhet ta përfundojmë." Në fillimet e një takimi të Grupit të 20-ës në Johanesburg të shtunën, më shumë se një duzinë udhëheqësish evropianë hartuan një kundërpropozim, duke e quajtur origjinalin "një bazë që do të kërkojë punë shtesë". (A2 Televizion)
A2 CNN Livestream
MUND TE LEXONI GJITHASHTU
