Presidenti rus Vladimir Putin njoftoi të hënën një armëpushim dyditor me Ukrainën, për të shënuar përvjetorin e fitores ndaj Gjermanisë naziste në Luftën e Dytë Botërore, raportuan agjencitë ruse të lajmeve duke cituar Ministrinë e Mbrojtjes.
Sipas njoftimit zyrtar, armëpushimi pritet të zbatohet për një periudhë të kufizuar dhe lidhet me ceremonitë përkujtimore të 9 Majit, një datë shumë e rëndësishme në Rusi, e njohur si Dita e Fitores, që përkujton kapitullimin e Gjermanisë naziste në vitin 1945.
Ky vendim shihet si një gjest simbolik, por edhe si një mundësi për ulje të përkohshme të tensioneve në front. Megjithatë, mbetet e paqartë nëse armëpushimi do të respektohet plotësisht në terren, duke pasur parasysh përplasjet e vazhdueshme mes forcave ruse dhe ukrainase, përcjell A2CNN.
Në raste të mëparshme, palët kanë akuzuar njëra-tjetrën për shkelje të armëpushimeve të shpallura njëanshmërisht, ndaj edhe këtë herë ka skepticizëm mbi efektivitetin e tij.
Konflikti mes Rusisë dhe Ukrainës vazhdon prej vitit 2022 dhe ka shkaktuar pasoja të mëdha humanitare, ekonomike dhe gjeopolitike në rajon dhe më gjerë. (A2 Televizion)
A2 CNN Livestream
MUND TE LEXONI GJITHASHTU
