Nuk ka një agjendë për një takim të mundshëm midis Vladimir Putin dhe Volodymyr Zelenskyy. Këtë fakt e ka bërë të ditur Ministri i Jashtëm rus Sergei Lavrov. Në një intervistë për median amerikane NBC, Lavorv tha se nuk ka agjendë për një samit të mundshëm midis Presidentit rus Vladimir Putin dhe homologut të tij ukrainas Volodymyr Zelenskiy, duke e akuzuar Zelenskiy se thotë "jo për gjithçka".
Lavrov tha se Putin e kishte bërë të qartë se ishte gati të takohej me Zelenskiy-n për të diskutuar një marrëveshje të mundshme për t'i dhënë fund luftës në Ukrainë, me kusht që të kishte një axhendë të duhur për një seancë të tillë, diçka që ai tha se mungonte për momentin.
"Putin është gati të takohet me Zelenskiy-n kur agjenda të jetë gati për një samit. Dhe kjo axhendë nuk është aspak gati", tha Lavrov për NBC-në.
Lavrov tha se Rusia kishte rënë dakord të tregonte fleksibilitet në një numër çështjesh të ngritura nga Trump në një samit SHBA-Rusi javën e kaluar, por akuzoi Ukrainën se nuk tregoi të njëjtën fleksibilitet në bisedimet me Trump dhe aleatët evropianë që pasuan në Uashington.
"Ai (Trump) tregoi qartë - ishte shumë e qartë për të gjithë se ekzistojnë disa parime që Uashingtoni beson se duhet të pranohen, duke përfshirë mosanëtarësimin në NATO (për Ukrainën), duke përfshirë diskutimin e çështjeve territoriale, dhe Zelenskiy tha jo për gjithçka", tha Lavrov. "Ai madje tha jo, siç thashë, për anulimin e legjislacionit që ndalon gjuhën ruse. Si mund të takohemi me një person që pretendon të jetë një udhëheqës?".
Trump kishte vendosur një afat deri më 8 gusht që Putini të binte dakord për t'i dhënë fund luftës ose të përballej me sanksione të reja kundër Rusisë dhe vendeve që blejnë naftën e saj, por në vend të kësaj pranoi të takohej me udhëheqësin e Kremlinit në një samit në Alaska të premten e kaluar. Që atëherë, Rusia ka treguar pak lëvizje, duke mbajtur shumicën e kërkesave të saj të hershme, ndërsa propozon të ngrijë vijën e frontit në dy rajone ukrainase që pretendon si të vetat, dhe duke shprehur gatishmërinë për të kthyer potencialisht pjesë relativisht të vogla të territorit ukrainas që kontrollon.
Putin dëshiron që Ukraina të heqë dorë nga i gjithë rajoni lindor i Donbasit, të heqë dorë nga ambiciet për t'u bashkuar me NATO-n, të mbetet neutrale dhe të mbajë trupat perëndimore jashtë vendit. Këto janë kushtet e Putin për ti dhënë fund luftës. (A2 Televizion)
A2 CNN Livestream
MUND TE LEXONI GJITHASHTU
