Një piceri në Gjermaninë perëndimore u bastis nga policia pasi dyshohet se u shërbente klientëve kokainë kur ata porosisnin artikullin me numër 40 nga menyja, që ishte edhe... specialiteti i dyqanit.
"Autoritetet u informuan për rrjetin e paligjshëm të drogës në mars nga inspektorët e ushqimit dhe oficerët e antidrogës nisën monitorimin e picerisë", tha të hënën drejtori i çështjeve kriminale Michael Graf von Moltke.
Kur policia shkoi për të arrestuar menaxherin e picerisë në banesën e tij, 36-vjeçari hodhi një qese me drogë nga dritarja, e cila "ra drejt e në krahët e oficerëve", sqaroi policia e Duseldorfit.
Gjatë kontrollit të imtësishëm në banesë u gjetën më pas 1.6 kilogramë kokainë, 400 gramë kanabis dhe 268 mijë euro cash, raporton A2. Menaxheri i restorantit u lirua nga policia disa ditë më vonë, dhe rihapi restorantin e tij dhe vazhdoi të shiste kombinimin drogë-picë.
Hetuesit shfrytëzuan mundësinë për të hetuar zinxhirin e furnizimit me drogë të picerisë, gjë që çoi në arrestimin e një rrjeti droge në Gjermaninë perëndimore disa javë më vonë.
Rreth 150 policë bastisën dy plantacione kanabisi, një në Mönchengladbach, në perëndim të Dyseldorfit ku u gjetën 300 bimë dhe një tjetër në Solingen, në lindje të qytetit, ku u gjetën 60 bimë, shkruan A2.
Gjithashtu u bastisën edhe shtëpitë dhe bizneset e 12 të dyshuarve, duke çuar në arrestimin e tre personave, mes të cilëve një 22-vjeçar i dyshuar si truri i rrjetit.
Policia gjeti gjithashtu armë, para dhe orë të shtrenjta. Menaxheri i picerisë u arrestua sërish teksa tentonte të largohej nga vendi dhe mbetet në paraburgim. “Numri 40 ishte një nga picat më të shitura”, sqaroi Moltke.
Policia nuk ka bërë të ditur emrat e personave të tjerë të përfshirë në operacionin e drogës dhe as çmimin e kombinimit të picës dhe kokainës. (A2 Televizion)
A2 CNN Livestream
MUND TE LEXONI GJITHASHTU
