Presidenti i SHBA-së, Donald Trump, ka paralajmëruar se mund të godasë infrastrukturën jetike të Iran nëse Teherani nuk pranon marrëveshjen që Uashingtoni po ofron, ndërsa njëkohësisht ka njoftuar për një raund të ri bisedimesh mes dy vendeve.
Në një postim në rrjetin e tij social Truth Social, Trump akuzoi Iranin për një “shkelje të plotë” të armëpushimit, duke pretenduar se ka hapur zjarr në Hormuz dhe madje ka qëlluar ndaj një anijeje franceze dhe një anijeje tregtare britanike. Ai gjithashtu tha se Irani ka deklaruar mbylljen e ngushticës, megjithëse sipas tij ajo tashmë është e bllokuar nga SHBA.
Trump theksoi se SHBA po ofron një marrëveshje që e cilësoi “shumë të drejtë dhe të arsyeshme”, por paralajmëroi pasoja të rënda në rast refuzimi. “Nëse nuk e pranojnë, Shtetet e Bashkuara do të shkatërrojnë çdo termocentral dhe çdo urë në Iran,” shkroi ai, duke shtuar se kjo mund të ndodhë “shpejt dhe lehtë” nëse nuk arrihet një marrëveshje.
Megjithatë, presidenti amerikan la të hapur edhe rrugën diplomatike, duke njoftuar se negociatorët amerikanë do të udhëtojnë drejt Pakistan për një raund të dytë bisedimesh me Iranin, që pritet të zhvillohet në Islamabad. Ai nuk dha detaje mbi përbërjen e delegacionit amerikan.
Ndërkohë, Shtëpia e Bardhë dhe zyra e zëvendëspresidentit JD Vance, i cili kishte udhëhequr raundin e parë të negociatave, nuk reaguan menjëherë ndaj kërkesave për koment.
Këto zhvillime vijnë në një moment tensionesh të larta mes Uashingtonit dhe Teheranit, ku retorika e ashpër shoqërohet me përpjekje për të arritur një marrëveshje që do të shmangte përshkallëzimin e mëtejshëm të konfliktit. (A2 Televizion)
A2 CNN Livestream
MUND TE LEXONI GJITHASHTU
