Shtetet e Bashkuara do të nisin nga sot në mëngjes lirimin e anijeve të bllokuara në Ngushticën e Hormuzit. Këtë e njoftoi presidenti amerikan Donald Trump në platformën e tij të mediave sociale, Truth.
“Për të mirën e Iranit, Lindjes së Mesme dhe Shteteve të Bashkuara, ne u kemi thënë këtyre vendeve se do t’i nxjerrim anijet e tyre në mënyrë të sigurt nga këto rrugë ujore të kufizuara”, shkroi ai në rrjetet sociale, pa specifikuar se cilat vende do të merrnin ndihmë, shkruan A2 CNN.
Në postimin e Trump, thuhet gjithashtu se përfaqësuesit e SHBA-së po zhvillonin diskutime "shumë pozitive" me Iranin.
"Jam plotësisht i vetëdijshëm se përfaqësuesit e mi po zhvillojnë diskutime shumë pozitive me Iranin dhe se këto diskutime mund të çojnë në rezultate jashtëzakonisht pozitive për të gjithë", tha Trump, duke raportuar se shumë prej anijeve të bllokuara po mbarojnë ushqimin.
Trump tha se çdo ndërhyrje në proces, të cilin ai e quajti "Projekti Liri", do të "duhet të trajtohet me forcë", përcjell A2 CNN.
Irani e ka kufizuar rëndë trafikun përmes kësaj rruge ujore jetësore që nga fillimi i luftës në shkurt, ndërsa edhe SHBA-ja ka zbatuar gjithashtu një bllokadë detare në portet iraniane.
Ligjvënësi i lartë iranian, Ebrahim Azizi , një ish-komandant në Trupat e Gardës Revolucionare Islamike të Iranit, shkroi në mediat sociale se "çdo ndërhyrje amerikane" do të "konsiderohej shkelje e armëpushimit".
Trump shtoi se operacioni do të ishte një "gjest humanitar" i bërë në emër të SHBA-së, Iranit dhe vendeve të tjera të Lindjes së Mesme, pa renditur se cilat vende. Ai nuk dha detaje të mëtejshme se si do të menaxhohej bashkëpunimi me Teheranin, shkruan A2 CNN.
"Në të gjitha rastet, ata thanë se nuk do të kthehen derisa zona të bëhet e sigurt për lundrim, dhe gjithçka tjetër... Lëvizja e anijeve ka për qëllim thjesht të çlirojë njerëzit, kompanitë dhe vendet që nuk kanë bërë absolutisht asgjë të gabuar", vazhdoi Trump. (A2 Televizion)
A2 CNN Livestream
MUND TE LEXONI GJITHASHTU
