Polonia nuk do të dërgojë trupa në Iran, deklaroi të martën kryeministri Donald Tusk, duke shtuar se konflikti nuk ndikon drejtpërdrejt në sigurinë kombëtare.
Duke iu përgjigjur thirrjeve të presidentit amerikan Donald Trump që aleatët e NATO-s të ndihmojnë në sigurimin e Ngushticës së Hormuzit, Tusk tha para një mbledhjeje të kabinetit se “Varshava ka detyra të tjera brenda NATO-s dhe aleatët tanë e kuptojnë këtë”.
Kryeministri u shpreh: “Polonia nuk do të dërgojë trupat e saj në Iran. Ky konflikt nuk ndikon drejtpërdrejt në sigurinë tonë.
Kjo vlen për forcat tona tokësore, ajrore dhe detare. Ajo që kemi në dispozicion duhet t’i shërbejë sigurisë së Baltikut”, tha ai, duke shtuar se aleatët, përfshirë Shtetet e Bashkuara, “e kuptojnë shumë mirë këtë” dhe se “nuk ka arsye për shqetësim”.
Komentet e Tusk vijnë pasi Trump javën e kaluar u bëri thirrje aleatëve në Europë dhe Azi që të ndihmojnë për të parandaluar Iranin nga bllokimi i Ngushticës së Hormuzit, një rrugë ujore shumë e rëndësishme midis Iranit, Emirateve të Bashkuara Arabe dhe Omanit, përmes së cilës kalon rreth 20% e furnizimit botëror me naftë dhe gaz natyror të lëngshëm, raportoi A2CNN.
Presidenti amerikan paralajmëroi të dielën se një “përgjigje negative” nga aleatët ndaj thirrjeve të tij për përfshirje ndërkombëtare mund të jetë “shumë e keqe për të ardhmen e NATO-s”.
Duke sulmuar anijet tregtare, Teherani ka bllokuar në mënyrë efektive ngushticën si pjesë e luftës në rajon, e cila nisi kur SHBA dhe Izraeli ndërmorën sulme të përbashkëta ndaj Iranit më 28 shkurt.
Bllokada ka shkaktuar një rritje të ndjeshme të çmimeve globale të naftës, duke detyruar qeveritë në mbarë botën të çlirojnë qindra miliona fuçi nga rezervat emergjente të naftës për të zbutur goditjen ekonomike.
Me përjashtim të operacioneve mbrojtëse ose të evakuimit, aleatët e NATO-s, të Uashingtonit kanë treguar hezitim për t’u përfshirë në konflikt, duke përmendur përvojat nga luftërat e gjata në Irak dhe Afganistan gjatë dy dekadave të fundit, si dhe pikëpyetjet mbi ligjshmërinë e sulmeve SHBA-Izrael ndaj Iranit.
Trump ka qenë shpesh kritik ndaj NATO-s, duke akuzuar prej kohësh vendet anëtare se nuk marrin mjaftueshëm përgjegjësi për sigurinë e tyre dhe se mbështeten tepër te Uashingtoni.
Presidenti amerikan ka nxitur gjithashtu shqetësime për të ardhmen e aleancës me kërcënimet e përsëritura, të bëra më herët këtë vit, për të aneksuar Greonlandën, pjesë e shtetit anëtar të NATO-s, Danimarkës. (A2 Televizion)
A2 CNN Livestream
MUND TE LEXONI GJITHASHTU
